फ्रान्सेली अधिकारीहरूले गत सातान्तमा भएका हिंसात्मक प्रदर्शनपछि देशभर विरोध कार्यक्रममाथि प्रतिबन्ध तथा नियन्त्रणका उपायहरू कडा पारेका छन् । जीवनयापनको बढ्दो लागतविरुद्ध भएका प्रदर्शनका क्रममा व्यापक लुटपाट, तोडफोड र आगजनी भएपछि सरकारले शान्ति सुरक्षा कायम गर्न कफ्र्युसहितका उपाय अपनाउने तयारी गरेको हो ।

राष्ट्रपति इम्यानुएल म्याक्रोँले बिहीबार प्रमुख मन्त्रीहरू तथा गुप्तचर अधिकारीहरूसँगको बैठकपछि शान्ति पुनर्बहाली गर्नु सरकारको प्राथमिकता रहेको बताए । उनले शुक्रबार रक्षा परिषद्को बैठक बोलाइएको जानकारी दिँदै शनिबार र त्यसपछिका दिनमा हुने राष्ट्रव्यापी प्रदर्शनबारे आवश्यक निर्णय गरिने बताए ।

अक्टोबर १७ मा जीवनयापनको बढ्दो लागतविरुद्ध पाँच लाखभन्दा बढी मानिस सडकमा उत्रिएका थिए । त्यसक्रममा भएका झडप र हिंसात्मक घटनाले अधिकारीहरूलाई थप सुरक्षा व्यवस्था गर्न बाध्य बनाएको छ । सरकारले प्रहरी परिस्थितिमाथि पूर्ण नियन्त्रण कायम गर्न नसकेको स्वीकार गरेको छ ।

म्याक्रोँले हिंसाका गम्भीर घटनामा गणतन्त्रलाई कमजोर बनाउने उद्देश्य राखेका सङ्गठित अति–वामपन्थी समूहहरू सङ्लग्न रहेको आरोप लगाए । यद्यपि, आगामी राष्ट्रपति निर्वाचनमा प्रतिस्पर्धा गर्ने विपक्षी नेताहरूले सरकार शान्ति सुरक्षा कायम गर्न असफल भएको आरोप लगाएका छन् ।

विरोध प्रदर्शनमाथि प्रतिबन्ध

पेरिस प्रहरीले बिहीबार विद्यार्थीहरूले आयोजना गर्न लागेको प्रदर्शनमा प्रतिबन्ध लगाएको छ । प्रतिबन्धविरुद्ध वकिलहरूले अदालतमा अन्तरिम आदेश मागेका छन् । विद्यार्थी नेता कोपेलिया मोरोले सरकारले प्रदर्शनकारीलाई ‘असल’ र ‘खराब’ समूहमा विभाजन गर्न खोजेको आरोप लगाउँदै विरोध गर्न पाउने अधिकारमाथि हस्तक्षेप भइरहेको बताए ।

त्यस्तै, फ्रान्सको तेस्रो ठूलो सहर लियोनमा शनिबारका लागि तय गरिएका सबै प्रकारका प्रदर्शनमाथि प्रतिबन्ध लगाइएको छ । त्यहाँ गत सातान्तमा २०० देखि ३०० पसलमा लुटपाट हुनुका साथै एउटा पर्यटक कार्यालयमा आगजनी गरिएको थियो । ग्रेनोबल, रुएन, ले हाभ्र र तुलोनलगायतका सहरले पनि मुख्य केन्द्रहरूमा प्रदर्शन गर्न रोक लगाएका छन् ।

पेरिसमा भने शनिबार पूर्वी क्षेत्रको बास्टिलबाट प्रदर्शन सुरु गर्न अनुमति दिइएको छ । तर, पसल तथा प्रमुख सार्वजनिक भवनहरू रहेका सहरको मुख्य केन्द्रमा प्रवेश गर्न रोक लगाइएको छ । जीवनयापनको लागतविरुद्ध आन्दोलनरत ‘येलो भेस्ट’ समूहले सरकारको निर्णयप्रति असहमति जनाएको छ ।

पक्राउ र राजनीतिक आरोप–प्रत्यारोप

गत सातान्तको हिंसापछि प्रहरीले दुई हजार पाँच सय जनालाई पक्राउ गरेकोमा १७४ जनालाई थुनामा राखिएको र ९०० भन्दा बढीविरुद्ध कानुनी कारबाही अघि बढाइएको न्यायमन्त्री जेराल्ड डार्मानिनले बताएको छन् ।

लिमोज सहरको ऐतिहासिक नगर भवनमा आगजनी गरेको आरोपमा ६६ वर्षीय एक पुरुषलाई बिहीबार पक्राउ गरिएको छ । उक्त घटनामा सङ्लग्न भएको आशङ्कामा अर्का एक पुरुष पनि यसअघि पक्राउ परेका थिए ।

अति–दक्षिणपन्थी नेतृ मरिन ले पेनले सरकार कमजोर भएको आरोप लगाउनुभएको छ । अर्कोतर्फ, अति–वामपन्थी नेता जाँ–लुक मेलन्शोनले अशान्तिका लागि सरकारी दमन जिम्मेवार रहेको बताएको छन् ।

प्रधानमन्त्री सेबास्टियन लेकोर्नुले बिहीबार प्रमुख राजनीतिक दलका प्रतिनिधिहरूसँग छलफल गरेका छन् । उनले आगामी दिनमा नगर प्रमुखहरू र विद्यार्थी समूहसँग पनि संवाद गर्ने कार्यक्रम रहेको छ ।रासस