काठमाडौँ । लेखक, साहित्यकार तथा युवा नेतृ शोभा अधिकारीले नेपाली कांग्रेसको १५औँ महाधिवेशनमा केन्द्रीय सदस्य पदमा उम्मेदवारी दिएकी छिन् ।

लामो समयदेखि कांग्रेसको राजनीति, साहित्य तथा प्राज्ञिक क्षेत्रमा सक्रिय अधिकारीले महिलातर्फको खस आर्यमा उम्मेदवारी दिएकी हुन् ।

कांग्रेस गोरखाले १५औँ महाधिवेशनका लागि सर्वसम्मत रूपमा केन्द्रीय महाधिवेशन प्रतिनिधिमा चयन गरेसँगै उनले केन्द्रीय सदस्यमा उम्मेदवारी दिएकी हुन् ।

उनी कांग्रेस गण्डकी प्रदेशको निवर्तमान शिक्षा, विज्ञान तथा प्रविधि विभाग प्रमुख तथा नेपाली कांग्रेस गोरखाकी महासमिति सदस्यसमेत हुन् ।

राजनीति, साहित्य र प्राज्ञिक क्षेत्रमा लामो अनुभव हासिल गरेकी अधिकारीले पार्टीको केन्द्रीय नेतृत्वमा आफ्नो अनुभव, अध्ययन र राजनीतिक योगदानलाई थप प्रभावकारी रूपमा अघि बढाउने उद्देश्यले उम्मेदवारी दिएकी हुन् ।

उनले कांग्रेस कार्यसमितिमा पत्रकार, लेखक, साहित्यकार, अध्यापक र समग्रमा बौद्धिक वर्गको हक, हित र सम्मानसँगै उनीहरूले समाजमा खेल्ने भूमिकाबारे गम्भीर बहस गर्ने बताइन् ।

पहिले राणा शासन र पञ्चायत ढाल्न यही वर्गले नै अहम् भूमिका खेलेकै कारणले आजको लोकतन्त्रमा रमाउन पाइएको उल्लेख गर्दै यो स्वतन्त्रतालाई व्यवस्थित र ऊर्जाशील बनाउन यही वर्गले फेरि समााजमा भूमिका खेल्नुपर्ने उनको धारणा छ ।

त्यसैगरी राजनीतिक दलहरूले देशको इतिहास, संस्कृति र पुरातत्वको विषयमा जानकार राख्नुपर्ने साथै देश र जनताप्रति सामाजिक उत्तरदायित्व वहन गर्न भूमिका खेल्नुपर्ने भएकाले पनि सबैलाई झक्झकाउने बताइन् ।

अधिकारीको राजनीतिक यात्रा विद्यार्थी जीवनदेखि नै शुरू भएको हो । उनले नेपाल विद्यार्थी संघ (नेविसंघ) को केन्द्रीय सदस्यका रूपमा तीन कार्यकाल जिम्मेवारी सम्हालेकी थिइन् । विद्यार्थी राजनीतिका क्रममा उनी कांग्रेसका वर्तमान नेतृत्वमा रहेका नेताहरूसँगै सक्रिय थिइन् ।

कांग्रेसका उपसभापति विश्वप्रकाश शर्मा नेविसंघको अध्यक्ष रहँदा अधिकारी पद्मकन्या क्याम्पसको स्वतन्त्र विद्यार्थी युनियन (स्ववियु) को उपसभापति थिइन् । त्यस्तै महामन्त्री गुरुराज घिमिरे नेविसंघको केन्द्रीय अध्यक्ष रहँदा अधिकारी सोही समितिको केन्द्रीय सदस्य थिइन् ।

उक्त समितिमा वर्तमान कांग्रेस सभापति गगनकुमार थापा महामन्त्री र हालका कांग्रेस महामन्त्री प्रदीप पौडेल उपाध्यक्ष थिए । विद्यार्थी राजनीतिबाट खारिँदै पार्टी राजनीतिमा सक्रिय भएकी अधिकारी त्यसपछि गोरखा कांग्रेसमा निरन्तर सक्रिय रहँदै आएकी छिन् ।

राजनीतिसँगै अध्ययन, अध्यापन तथा लेखनमा समेत सक्रिय अधिकारीले व्यवस्थापन संकायमा एमबीएस तथा समाजशास्त्र मानवशास्त्रमा एमए गरेकी छिन् । उनी हाल त्रिभुवन विश्वविद्यालयबाट पीएचडी अध्ययनरत छिन् । उनले लामो समय कलेजमा प्राध्यापनसमेत गरेकी थिइन् ।

विसं २०५७ सालदेखि लेखन तथा प्रशिक्षण क्षेत्रमा सक्रिय अधिकारी नेपाली लेखक संघकी केन्द्रीय सदस्य रहेकी छिन् । उनका समसामयिक राजनीति, समाज, संस्कृति तथा साहित्यसम्बन्धी ७०० भन्दा बढी लेख–रचना विभिन्न राष्ट्रिय दैनिक तथा अनलाइन सञ्चारमाध्यममा प्रकाशित छन् ।

अधिकारीका ‘आमाको आँखा’ लघुकथा संग्रह तथा ‘सफलताका २७ स्वर्णिम सूत्रहरू’ प्रेरणात्मक पुस्तक प्रकाशित भइसकेका छन्।

साहित्य तथा लेखनका माध्यमबाट सामाजिक, राजनीतिक र सांस्कृतिक विषयमा निरन्तर कलम चलाउँदै आएकी अधिकारी साहित्यिक क्षेत्रमा समेत परिचित छिन् ।

अधिकारीको पारिवारिक पृष्ठभूमि पनि लोकतान्त्रिक आन्दोलनसँग जोडिएको छ। पञ्चायतकालमा लोकतन्त्रका पक्षमा सक्रिय रहँदा निर्वासन जीवन बिताउनुपरेका तथा सर्वस्वहरणमा परेका तेह्रथुमका स्वर्गीय हरिप्रसाद दाहालको परिवारसँग उनको पारिवारिक सम्बन्ध रहेको छ।