काठमाडौं । भारतीय मुख्य निर्वाचन आयुक्त ज्ञानेकुमारविरुद्ध कक्रोच जनता पार्टीले शुक्रबार नयाँ दिल्लीमा प्रदर्शन गर्दैछ ।

भोट चोरीको आरोप खेपिरहेका मुख्य निर्वाचन आयुक्त ज्ञानेशकुमारले पदबाट राजीनामा नदिएसम्म प्रदर्शन नरोकिने कक्रोच जनता पार्टीले चेतावनी दिएको छ ।

शुक्रबार दिउँसो ज्ञानेशकुमारविरुद्ध जन्तर मन्तरमा विरोध प्रदर्शनको तयारी भइरहेको छ । दिल्ली प्रहरीले धारा १६३ लागू गर्दै जन्तर मन्तरमा आयोजना गरिएको विरोध प्रदर्शनका लागि अनुमति दिन अस्वीकार गरेको छ।

सामाजिक कार्यकर्ता र विद्यार्थी नेताहरूले विरोध प्रदर्शनको आयोजना गरेका छन्। विरोध प्रदर्शनलाई ध्यानमा राख्दै, प्रहरीले नयाँ दिल्ली र वरपर सुरक्षा बढाएको छ। सम्भावित भीड जम्मा हुने सम्भावनालाई ध्यानमा राख्दै जन्तर मन्तरमा केन्द्रीय सशस्त्र प्रहरी बलका कर्मचारीहरू तैनाथ गरिएको छ।

दिल्ली प्रहरीले भारतीय नागरिक सुरक्षा संहिताको धारा १६३ लागू गर्र्दै सुरक्षा बढाएको छ।

नयाँ दिल्लीका डीसीपीले सामाजिक सञ्जाल प्लेटफर्ममा लेखेका छन्, ‘नयाँ दिल्लीमा सार्वजनिक सुरक्षा, कानून व्यवस्था र सहज ट्राफिक प्रवाह सुनिश्चित गर्न बीएनएसएस २०२३ को धारा १६३ लागू गरिएको छ। यसअन्तर्गत, अनुमतिबिना मानिसहरूको भेला, सार्वजनिक भाषण, नाराबाजी, जुलुस, प्रदर्शन, धर्ना र आदेशमा तोकिएका अन्य गतिविधिहरू निषेधित छन्।’

कांग्रेससहित धेरै विपक्षी दलहरूले निर्वाचन आयोगले मतदाता सूची हेरफेर गरेर भाजपालाई चुनाव जित्न मद्दत गरिरहेको आरोप लगाएका छन्। मुख्य निर्वाचन आयुक्त ज्ञानेशकुमारलाई प्रधानमन्त्री नरेन्द्र मोदीको संरक्षण रहेको भन्दै विपक्षीहरू एकजुट भएका छन् ।

एक वर्षअघिको लोकसभा निर्वाचन र हालैको केही राज्यका विधान सभा निर्वाचनमा लाखौं भारतीयको नाम मतदाता सूचीबाट हटाइएको थियो । जसले गर्दा बिजेपीलाई चुनाव जित्न सहज भएको विपक्षी दलहरूको आरोप छ ।

प्रकाशित समय : १२:२१ बजे