काठमाडौं । भोटेकोसी क्षेत्रमा आएको विनाशकारी बाढीबाट प्रभावित नागरिकलाई राहत पुर्‍याउने उद्देश्यले सिक्किमबाट आएको नेपाल राहत स्वयंसेवक टोलीले नुवाकोटमा राहत सामग्री वितरण गर्ने कार्यक्रम अघि बढाएको छ।

सिक्किमका मुख्यमन्त्री पीएस गोलेको पहलमा आएको ३५ सदस्यीय राहत तथा स्वयंसेवक टोलीले नुवाकोट पुगेर बाढी प्रभावित परिवारलाई औषधि, खाद्यान्न, सोलार बत्ती, त्रिपाल, म्याट्रेस तथा स्लिपिङ ब्यागलगायत अत्यावश्यक सामग्री वितरण गर्ने  छ।

टोलीको नेतृत्व सोनाम नोर्गे लाचुम्पाले गरेका छन्। विपद्का कारण प्रभावित बनेका परिवारलाई तत्काल आवश्यक सामग्री उपलब्ध गराउने उद्देश्यले राहत अभियान सञ्चालन गरिएको टोलीले जनाएको छ।

राहत अभियानको समन्वयमा नवप्रवर्तन तथा विज्ञान प्रविधिमन्त्री महावीर पुन, नेपाली कांग्रेसका संघीय सांसद सन्दिप राणा तथा युवा व्यवसायी टीका भण्डारीको भूमिका रहेको जनाइएको छ।

यसैबीच, राहत टोलीको स्वागत, सम्मान तथा स्थानीयस्तरमा आवश्यक समन्वय लायन्स क्लब अफ रञ्जना ब्रदर्शका संस्थापक अध्यक्ष लायन हरिकृष्ण दाहालले गरेका थिए। राहत टोलीको स्वागत तथा समन्वय कार्यक्रम बुढानीलकण्ठस्थित होटल सव्रीनामा आयोजना गरिएको थियो।

कार्यक्रममा विपद्का बेला प्रभावित समुदायलाई तत्काल राहत उपलब्ध गराउनुका साथै नेपाल र सिक्किमबीचको सम्बन्ध र सहकार्यलाई थप सुदृढ बनाउने विषयमा समेत जोड दिइएको थियो।

भोटेकोसी बाढीबाट नुवाकोटसहित विभिन्न जिल्ला प्रभावित भएका बेला सिक्किमबाट आएको राहत सहयोगले प्रभावित परिवारलाई खाद्यान्न, स्वास्थ्य सामग्री तथा अस्थायी आवासका लागि आवश्यक सामग्री उपलब्ध गराउन सहयोग पुग्ने अपेक्षा गरिएको छ।

टोलीका नेतृत्वकर्ता सोनाम नोर्गे लाचुम्पाले सिक्किमका वर्तमान मुख्यमन्त्री पीएस गोले तामाङले भारतका विभिन्न स्थानमा बसोबास गर्ने नेपाली समुदायप्रति अभिभावकीय भूमिका निर्वाह गर्दै आएको बताए। उनले निकट भविष्यमा थप राहत सामग्रीसहित मुख्यमन्त्री गोले नेपाल आउने जानकारीसमेत दिएका छन्।

प्रकाशित समय : १९:१९ बजे