काठमाडौं । गृहमन्त्री सुदन गुरुङले आवश्यक परेका थप मिनी एक्सकाभेटरहरू नागरिकको सक्रिय सहयोगमा जुटेको भन्दै सबैप्रति हार्दिक आभार तथा धन्यवाद व्यक्त गरेका छन्।

सामाजिक सञ्जालमार्फत जानकारी दिँदै गृहमन्त्री गुरुङले उपकरण व्यवस्थापनका लागि सर्वसाधारण तथा सम्बन्धित सबै पक्षले देखाएको तत्परता, सूचना र समन्वय अमूल्य रहेको बताएका हुन् ।

गृहमन्त्री गुरुङले सामाजिक सञ्जालमा लेखेका छन्, ‘धन्यवाद तथा हार्दिक आभार ! हामीलाई थप मिनी एक्सकाभेटरहरूको आवश्यकता परेपछि यहाँहरू सबैले दिनुभएको सूचना, तत्परता र सहयोग अमूल्य रह्यो। यहाँहरूकै सहयोगले गर्दा हामीले आवश्यक एक्सकाभेटरहरू भेट्टाइसकेका छौँ।’

संकट तथा आपतकालीन अवस्थामा नागरिकको सहकार्य नै सबैभन्दा ठूलो शक्ति हुने उल्लेख गर्दै उनले थपेका छन्, ‘राज्यका हरेक नागरिक यसरी नै एक भएर लाग्ने हो भने जुनसुकै चुनौतीको सामना गर्न सकिन्छ। यहाँहरूको यो ऐक्यबद्धता र सहयोगको लागि धेरै–धेरै धन्यवाद ।’

प्रकाशित समय : ०७:५८ बजे