हिमालय लाइफ इन्स्योरेन्स कम्पनीले नयाँ प्रमुख कार्यकारी अधिकृत (सीईओ) नियुक्तिका लागि सुरु गरेको प्रक्रियामा अदालतले रोक लगाएको छ । हाल कम्पनीका निलम्बित सीईओ कपिल कुमार दाहालले बीमा प्राधिकरण र कम्पनी विरुद्ध दायर गरेको नयाँ सीईओ नियुक्ती प्रक्रिया रोक्का गरिपाउँ भन्ने मुद्दामा सर्वोच्च अदालले अन्तरिम आदेश दिँदै प्रक्रिया रोक्न भनेको हो ।

सोमबार भएको एकल सुनुवाईपछि अल्पकालिन अन्तरिम आदेश जारी भएको छ । अब बीमा प्राधिकरण र हिमालयन लाइफ समेतलाई उपस्थित गराएर भदौ १५ गते अल्पकालिन आदेश जारी राख्ने कि खारेज गर्ने भन्ने बिषयमा बहस हुनेछ । हिमालयन लाइफ इन्स्योरेन्स कम्पनीले नयाँ सीईओ नियुक्तीका लागि आवेदन खुल्ला गरेकोमा हाललाई सर्वोच्च अदालतको आदेशद्वारा स्थगित भएको छ ।

सर्वोच्च अदालतले दुवै पक्षलाई यही भदौं १५ गते उपस्थित हुन भनेकोले सो दिन छलफल हुनेछ । बीमा ऐनमा भएको व्यवस्था अनुसार बीमा ऐन बमोजिमको मुद्दा अदालतमा चलेको अवस्थासम्म दाहाल सीईओमा फर्कने सम्भावना छैन । दाहाल धितोपत्र सम्बन्धी कसुरमा गत साउन २२ गते धरौटीमा रिहा भएका थिए । भदौं १५ गतेको बहसमा अन्तरिम आदेशले निरन्तरता नपाएको अवस्थामा हिमालयन लाइफमा सीईओ नियुक्तीको मार्गप्रसस्त हुनेछ । अन्तरिम आदेश जारी भएको अवस्थामा डेपुटी सिईओले कामु सीईओका रुपमा काम कारबाही गर्नु पर्नेछ ।