काठमाडौँ । पशुसेवा विभागले बर्डफ्लुबाट प्रभावित ११ जिल्लामा रोग नियन्त्रणका क्रममा नष्ट गरिएका पन्छी तथा वस्तुको क्षतिपूर्तिस्वरुप करिब ५२ करोड रुपैयाँ एक साताभित्र किसानलाई उपलब्ध गराउने तयारी गरेको छ।

विभागले रोग नियन्त्रणका क्रममा किसानका नष्ट गरिएका पन्छी, अण्डा तथा दानाबापत सम्बन्धित धनीलाई क्षतिको मूल्याङ्कनका आधारमा ७५ प्रतिशत राहतस्वरूप उपलब्ध गराउने तयारी गरेको हो।

विभागका प्रवक्ता मुकुल उपाध्यायले पन्छी, पन्छीजन्य पदार्थ र पन्छी उत्पादन सामग्रीको क्षति प्रमाणित भएर मागदाबी गरेका सम्बन्धित धनीका बैंक खातामा एक साताभित्र रकम भुक्तानी गरिने जानकारी दिए। उनका अनुसार असार मसान्तसम्म क्षतिपूर्ति लिन नसकेका किसानलाई नयाँ आर्थिक वर्षमा रकम उपलब्ध गराइनेछ।

बर्डफ्लु नियन्त्रण नियमावलीअनुसार प्रमाणित क्षतिको मूल्याङ्कन गरेर किसानलाई राहत वितरण गरिने जनाइएको छ। प्रवक्ता उपाध्यायले पन्छी तथा पन्छीजन्य वस्तु नष्ट गरेको सबै प्रमाणसहित जिल्ला पशुसेवा कार्यालयमा निवेदन दिन सम्बन्धित किसानलाई आग्रह गरे।

बर्डफ्लु सङ्क्रमणका कारण काठमाडौँ, ललितपुर, भक्तपुर, काभ्रेपलाञ्चोक, झापा, मोरङ, सुनसरी, महोत्तरी, बारा, चितवन र नवलपरासी जिल्ला बढी प्रभावित भएका छन्। हालसम्म करिब सात लाख पन्छी, ११ लाख अण्डा र तीन लाख किलो दाना नष्ट गरिएको तथा करिब ७० करोड रुपैयाँ बराबरको आर्थिक क्षति भएको अनुमान विभागले गरेको छ।

गत वर्षको तुलनामा १२.६२ प्रतिशतले रोपाइँमा कमी

मौसमको प्रतिकूलताका कारण यस वर्ष देशभर धान रोपाइँ गत वर्षको तुलनामा १२।६२ प्रतिशतले कमी आएको छ। गत वर्ष ४५ प्रतिशत रोपाइँ भएकामा यस वर्ष ३२।३८ प्रतिशत रोपाइँ भएको हो।

सोमबारसम्म देशभर चार लाख ४३ हजार ५९५ हेक्टर क्षेत्रफलमा रोपाइँ भएको कृषि विभागका महानिर्देशक प्रकाशकुमार सञ्जेलले जानकारी दिए। उनका अनुसार रोपाइँ हुने कुल क्षेत्रफल १३ लाख ७० हजार ६२ हेक्टर रहेको छ।

विभागका अनुसार सुदूरपश्चिम प्रदेशमा ५७.९, गण्डकीमा ४१, कर्णालीमा ४०.५, लुम्बिनीमा ३७.३, बागमतीमा ३३.२, कोशीमा ३१.५ र मधेस प्रदेशमा १५.६ प्रतिशत रोपाइँ भएको छ।

महानिर्देशक सञ्जेलले जलवायु परिवर्तनका कारण समयमा मनसुन सक्रिय हुन नसक्दा रोपाइँमा कमी आएको बताए। तर देशका अधिकांश स्थानमा वर्षा भएपछि रोपाइँमा सुधार आउने अपेक्षा गरिएको उनले बताए।

उनले धान उत्पादन तथा क्षेत्रफलका हिसाबले तराई क्षेत्र उपयुक्त मानिए पनि मधेस प्रदेशमा १५।६ प्रतिशत मात्र रोपाइँ भएकाले धान उत्पादनमा कमी आउन सक्ने प्रक्षेपण गरिएको बताए। सो क्षेत्रबाट धानको उत्पादकत्व वृद्धि भई कुल उत्पादनको करिब ७० प्रतिशत योगदान रहने तथा पहाडी क्षेत्रमा करिब ३० प्रतिशत उत्पादन हुने जनाइएको छ।

प्रकाशित समय : ०५:४७ बजे