झापा ।अर्जुनधारा नगरपालिका–९ मा रहेको कछुवा उद्धार तथा संरक्षण केन्द्रमा दश प्रजातिका कछुवा संरक्षण गरिएको छ ।

मुलुकमा पाइने कछुवाका प्रजातिमध्ये झन्डै ८० प्रतिशत लोप हुने अवस्थामा पुगेकाले केन्द्रले कर्मचारी परिचालन गरेर कछुवा संरक्षण गरिरहेको बताएको छ ।

सुखानी सहिद स्मृति प्रतिष्ठान र ‘आर्को नेपाल’को सहकार्यमा सन् २०१२ मा झापामा स्थापित यस केन्द्रमा हाल देशमा पाइने कुल प्रजातिको ५० प्रतिशतभन्दा बढी अर्थात् १० प्रजातिका करिब ५० वटा कछुवा संरक्षित छन् । केन्द्रले सन् २०२० देखि अति सङ्कटापन्न अवस्थाको भुइँ कछुवा (ठोटरी) को सफल प्रजनन र उद्धार गरिएका कछुवाको प्राकृतिक वासस्थानमा पुनःस्थापना पनि गरेको आएको छ ।

कछुवा उद्धार तथा संरक्षण केन्द्रका प्रतिनिधि तपिलप्रकाश राईले जैविक विविधता र पारिस्थितिक प्रणाली सन्तुलनमा कछुवाको भूमिका महत्वपूर्ण हुने भएकाले यसको संरक्षण गरिएको बताए। उनि भन्छन,“ जल र जमिनमा बस्ने कछुवाले खाद्य शृङ्खलामा सघाउँछन् ।”

जमिनमा बस्ने कछुवाले वनस्पतिका बीउहरू फैलाउन र सिमसारका कछुवाले अस्वस्थ जीवहरू खाएर पानी शुद्धीकरण गर्न मद्दत पु्याउने उनको धारणा छ ।

मरुभूमिमा कछुवाले खनेका खाडलमा ४०० भन्दा बढी प्रजातिका जीवले आश्रय पाउने र समुद्री कछुवाका माध्यमबाट समुद्रको पौष्टिक तत्व जमिनसम्म आइपुग्ने भएकाले कछुवा जोगाउनु पृथ्वीको संरक्षण गर्नु हो । उनले कछुवा भेटिएमा तुरुन्त डिभिजन वन कार्यालय वा संरक्षण केन्द्रमा खबर गर्न आग्रह गरेको छ ।

प्रकाशित समय : १६:२८ बजे