झापा । जङ्गली हात्तीबाट सर्वसाधारणको जीउधनको सुरक्षा गर्न जिल्लामा ‘स्पेसल टास्क फोर्स’ परिचालन गरिने भएको छ ।

प्रधानमन्त्री कार्यालयको निर्देशनमा ‘स्पेसल टास्क फोर्स’ गठनको प्रक्रिया अघि बढेको झापा निर्वाचन क्षेत्र नं १ की प्रतिनिधिसभा सदस्य निशा डाँगीले जानकारी दिइन् । उनका अनुसार प्रधानमन्त्री कार्यालयले सम्बन्धित निकायलाई प्रक्रिया अघि बढाउन निर्देशन दिइसकेको छ ।

मेचीनगर नगरपालिका–४ मा जङ्गली हात्तीको आक्रमणमा ६२ वर्षीया पद्मा पौडेलको मृत्यु भएपछि स्थानीयवासीले सुरक्षाको माग गर्दै आएका छन् ।

घटनापछि सांसद डाँगी र राष्ट्रियसभा सदस्य रोशनी मेचेले संसद्मा समेत हात्ती नियन्त्रणका लागि प्रभावकारी कदम चाल्न माग गरेका थिए ।

प्रस्तावित ‘स्पेसल टास्क फोर्स’मा सशस्त्र प्रहरी, नेपाल प्रहरी र सशस्त्र वन रक्षकलाई समावेश गरिने भएको छ । यसको परिचालन प्रमुख जिल्ला अधिकारीमार्फत हुने कार्ययोजना रहेको छ ।

फोर्सलाई विशेषगरी मेचीनगरको सीमावर्ती बाहुनडाँगी क्षेत्रमा खटाइने योजना छ । उक्त क्षेत्र भारतको आसाम र पश्चिम बङ्गालबाट जङ्गली हात्ती नेपाल प्रवेश गर्ने प्रमुख मार्गका रूपमा रहेको छ ।

हालसम्म फोर्समा कति सुरक्षाकर्मी परिचालन गर्ने भन्ने यकिन भइनसकेको भए पनि करिब ५० जना सुरक्षाकर्मीको प्रस्ताव गरिएको छ । प्रारम्भिक चरणमा कम्तीमा १० जनाको टोली परिचालन गर्नुपर्ने सुझाव पनि आएको छ ।

मेचीनगरमा ‘स्पेसल टास्क फोर्स’ परिचालन हुने खबरपछि स्थानीयवासी उत्साहित भएका छन् । मेचीनगर–४ का वडाध्यक्ष अर्जुन कार्कीले हात्ती नियन्त्रणका लागि तालिमप्राप्त सुरक्षाकर्मी खटाइनु सकारात्मक हुने बताए ।

पूर्व बाहुनडाँगी गाउँ विकास समितिका अध्यक्ष नीलकण्ठ तिवारीले भारततर्फबाट हात्ती प्रवेश रोक्ने ठोस कार्ययोजना आवश्यक रहेको बताए ।

प्रकाशित समय : ०९:२६ बजे