काठमाडौं । राष्ट्रिय स्वतन्त्र पार्टीले पार्टी संगठनलाई थप सुदृढ र प्रभावकारी बनाउने उद्देश्यसहित विभिन्न विभाग तथा प्रदेश तहमा नयाँ जिम्मेवारी बाँडफाँट गरेको छ ।

आइतबार वनस्थलीस्थित पार्टीको केन्द्रीय कार्यालयमा बसेको केन्द्रीय सचिवालय बैठकले शिक्षा, स्टार्ट–अप तथा ¥यापिड एक्सन टिम (आरएटी) लगायतका विभागमा नयाँ पदाधिकारी मनोनयन गर्ने निर्णय गरेको हो ।

बैठकले मिलन पाण्डेलाई पार्टीको केन्द्रीय शिक्षा विभाग प्रमुखमा मनोनयन गरेको छ । शिक्षा क्षेत्रसँग सम्बन्धित नीति, कार्यक्रम तथा संगठनात्मक गतिविधिलाई प्रभावकारी बनाउने जिम्मेवारी उनलाई दिइएको पार्टीका प्रवक्ता मनिष झाले बताए ।

त्यसैगरी, स्टार्ट–अप तथा उद्यमशीलता क्षेत्रलाई प्राथमिकतामा राख्दै डा. प्रभात अधिकारीलाई स्टार्ट–अप विभाग प्रमुखको जिम्मेवारी प्रदान गरिएको छ ।
प्रवक्ता झाले युवामाझ उद्यमशीलता प्रवद्र्धन गर्ने तथा नवप्रवर्तनसम्बन्धी गतिविधिलाई संस्थागत रूपमा अघि बढाउने उद्देश्यले उक्त विभागलाई सक्रिय बनाएको बताएका छन् ।

यस्तै, पार्टीको द्रुत कार्य टोली (आरएटी) को केन्द्रीय विभाग प्रमुखमा मकवानपुरका बैकुण्ठ थापा (आशिष) लाई मनोनयन गरिएको छ भने उप–प्रमुखमा सशस्त्र प्रहरी बल (एपीएफ) का पूर्व डीआईजी विदुर खड्कालाई चयन गरिएको छ । उक्त टोलीलाई पार्टीका विभिन्न गतिविधिमा द्रुत समन्वय, व्यवस्थापन तथा आवश्यक परिचालनको जिम्मेवारी रहने बताइएको छ ।

यसैगरी, सचिवालय बैठकले कर्णाली प्रदेश संगठनलाई थप सशक्त बनाउने उद्देश्यले राजबहादुर साह र अविसरा सुवेदीलाई कर्णाली प्रदेशको सह–महामन्त्रीमा मनोनयन गर्ने निर्णय गरेको छ ।

पार्टीले संगठन विस्तार, विभागीय संरचना सुदृढीकरण तथा प्रदेश तहमा प्रभावकारी समन्वय कायम गर्न यी नियुक्तिहरू गरिएको जनाएको छ ।

प्रकाशित समय : २०:५३ बजे