काठमाडौं- आईसीसी विश्वकप लिग–२ अन्तर्गत त्रिकोणात्मक श्रृंखलामा नेपालले यूएईसमक्ष २९० रनको चुनौतीपूर्ण लक्ष्य प्रस्तुत गरेको छ।

कीर्तिपुरस्थित त्रिवि क्रिकेट मैदानमा शुक्रबार टस जितेर ब्याटिङ रोजेको नेपालका लागि दीपेन्द्रसिंह ऐरीले उत्कृष्ट शतकीय पारी खेले। उनले ९४ बलमा १३ चौका र एक छक्कासहित शतक पूरा गर्दै टोलीलाई बलियो स्थितिमा पुर्‍याए।

यसअघि यही श्रृंखलाको पहिलो खेलमा पनि उनले युएईविरुद्ध ७५ रन बनाएका थिए भने ओमानविरुद्धको खेलमा ६० रनको योगदान दिएका थिए।

ओपनर विनोद भण्डारीले ५६ रन बनाउँदै राम्रो सुरुआत दिलाए। कप्तान रोहित पौडेलले ३९ रन जोडे। डेब्यु खेलिरहेका अर्जुन कुमाल र आरिफ शैखले समान ११–११ रन बनाए।

सातौँ नम्बरमा आएका गुलशन झाले डेथ ओभरमा आक्रामक ब्याटिङ गर्दै ४४ रनको महत्वपूर्ण योगदान दिए। अन्य खेलाडीहरूमा भीम सार्की र सोमपाल कामीले भने उल्लेखनीय योगदान गर्न सकेनन्।

दीपेन्द्रको शतक, विनोदको अर्धशतक र अन्तिमक्रममा गुलशनको आक्रामक इनिङ्स मद्दतमा नेपालले प्रतिस्पर्धात्मक चुनौती दिएको हो ।

प्रकाशित समय : १४:१९ बजे