तनहुँ । जिल्लामा पहिलोपटक घरमै पुगेर सेवाग्राहीलाई राहदानी उपलब्ध गराइएको छ । सङ्घीय सरकारले अघि सारेको शासकीय सुधारसम्बन्धी एक सय कार्यसूचीअन्तर्गत हुलाकमार्फत सेवा विस्तार गर्ने योजनालाई व्यवहारमा उतार्न जिल्लामा पहिलोपटक राहदानी सेवा घरमै वितरण गरिएको हो ।

तनहुँको व्यास नगरपालिका–५ बरबोटे निवासी समीक्षा ओझालाई प्रमुख जिल्ला अधिकारी शिवलाल तिवारीले आज घरमै पुगेर राहदानी उपलब्ध गराएका छन । सरकारले जारी गर्ने प्रमाणपत्रहरू घरमै पुगेर उपलब्ध गराउने निर्णय बमोजिम जिल्लामा राहदानीबाट सेवा सुरु गरिएको उनले बताए ।

प्रमुख जिल्ला अधिकारी तिवारीले हुलाक कार्यालयमार्फत सेवा घरदैलो पु-याउने बताउँदै थपे, “सेवा प्रदान गर्ने कार्यालयले प्रमाणपत्र हुलाक कार्यालयलाई हस्तान्तरण गर्ने र हुलाक कार्यालयले सम्बन्धित व्यक्तिको घरमा पु-याउने व्यवस्था मिलाइएको छ ।” उनका अनुसार सेवा लिन आउने बेलामा सेवाग्राहीलाई यो सेवा कार्यालयमा आएर लिने वा घरमै लिने भनेर फारम भराइन्छ । त्यसकै आधारमा सेवा दिइने उनको भनाइ छ ।

जिल्ला हुलाक कार्यालय तनहुँका प्रमुख शिरिष उपाध्यायले सरकारको १०० बुँदे कार्यसूचीको २७ नम्बर बुँदामा हुलाक कार्यालयलाई प्रभावकारी बनाउने भन्ने उल्लेख भएकामा सोही कार्यान्वयन गर्ने सन्दर्भमा तनहुँमा पहिलोपटक राहदानी घरमै पु-याउने सेवा सुरु गरिएको जानकारी दिए । उनले पहिलो दिन आज सो वडाका चार जनालाई राहदानी घरमै लगेर प्रदान गरिएको बताए ।

सो सेवा कार्यान्वयनका लागि जिल्लाभरका हल्काराहरुको क्षेत्र निर्धारण गरिएको छ । उनले भने, “जसरी चिठीपत्र वितरण गरिन्छ त्यसरी सरकारी कार्यालयबाट जारी हुने कागजपत्र घरमै पु-याउन हामी तयार छौँ ।” उनका अनुसार राहदानीका लागि फारम भर्ने बेलामा सेवाग्राहीलाई अर्को फारम भर्नुपर्ने व्यवस्था गरिएको छ । परिचय खुल्ने विस्तृत विवरण, घर पहिचानको आधार, मोबाइल नम्बर सबै विवरण पहिल्यै लिने गरिएकाले घरमै पुगेर सेवा दिन सहज हुने उपाध्यायको भनाइ छ ।

घरमै राहदानी बुझेपछि समीक्षा ओझाले सरकारको निर्णयले सर्वसाधारणलाई सहज हुने प्रतिक्रिया दिइन । उनले सार्वजनिक सेवा प्रविधिमैत्री र सेवाग्राही लक्षित बन्दै जानुपर्नेमा जोड दिइन ।

प्रकाशित समय : २०:०८ बजे