हर्मुज जलमार्ग खुला गर्ने इरानको घोषणापछि अन्तर्राष्ट्रिय बजारमा कच्चा तेलको मूल्यमा तीव्र गिरावट देखिएको छ । हर्मुज खुला रहने इरानको घोषणासँगै आपूर्ति अवरोधको चिन्ता घटेपछि बजारमा तेलको मूल्य ओरालो लागेको हो ।

विश्लेषकहरूका अनुसार आपूर्ति सहज हुने संकेतले लगानीकर्तामा विश्वास बढाउँदा मूल्यमा दबाब परेको हो ।

इरानका विदेशमन्त्री अब्बास अराघचीले युद्धविराम अवधिभर जलमार्ग पूर्ण रूपमा खुला रहने बताएका थिए । सामाजिक सञ्जाल एक्समार्फत उनले लेबनानसँगको युद्धविरामको सन्दर्भ जोड्दै हर्मुज हुँदै हुने व्यावसायिक जहाजहरूको आवतजावत निर्बाध रूपमा सञ्चालन हुने स्पष्ट पारेका थिए ।

यस घोषणापछि विश्व बजारमा कच्चा तेलको मूल्य झण्डै १५ प्रतिशतसम्म घटेको देखिएको छ । केही दिनअघि मात्रै क्षेत्रीय तनावका कारण मूल्य उकालो लागेको थियो । हर्मुज जलमार्ग विश्वकै महत्वपूर्ण तेल ढुवानी मार्ग भएकाले यहाँको अवस्थाले सिधै अन्तर्राष्ट्रिय बजार प्रभावित पार्ने गर्छ ।

हाल भने युद्धविराम लागू भएसँगै आपूर्ति पुनः सामान्य हुने अपेक्षा गरिएको छ । दुई साताका लागि गरिएको इरान–अमेरिका युद्धविराम आगामी २२ अप्रिलमा सकिने तय छ ।

प्रकाशित समय : २०:२२ बजे