काठमाडौं । नेपाल चार्टर्ड एकाउन्टेन्ट संस्था (आइक्यान) ले पहिलो क्याम्पस प्लेसमेन्ट कार्यक्रम सफलतापूर्वक सम्पन्न गरेको छ । यसबाट रोजगारीको आकांक्षा राख्ने पेसाकर्मी र अग्रणी रोजगारदाताबीच प्रत्यक्ष सम्पर्क निर्माण गर्ने ऐतिहासिक उपलब्धि हासिल भएको छ । यो कार्यक्रम रोजगारीको लागि आवश्यक योग्यता अभिवृद्धि गर्ने, उद्योग र शैक्षिक संस्थाबीचको सहकार्य सुदृढ बनाउने, संरचित करिअरका अवसर उपलब्ध गराउने तथा उम्मेदवारलाई व्यावसायिक क्षेत्रको व्यावहारिक अनुभव प्रदान गर्ने उद्देश्यले आयोजना गरिएको हो ।

कार्यक्रममा उत्पादन तथा व्यापार, एकाउन्टिङ आउटसोर्सिङ, बीमा कम्पनीहरू, बैंक तथा वित्तीय संस्था, पुँजी बजार तथा लगानी कम्पनीहरू लगायत विभिन्न उदीयमान क्षेत्रहरूको प्रतिनिधित्व गर्ने १८ प्रतिष्ठित रोजगारदाताको सहभागिता रहेको थियो ।

उक्त कार्यक्रमको लागि ९२ उम्मेदवारले नाम दर्ता गराएका थिए, जसमा उनीहरूको उत्साह, तयारी र आफ्नो व्यावसायिक करिअर सुरु गर्ने दृढ प्रतिबद्धता प्रतिबिम्बित छ । संस्थाको यो प्रयासले अर्थपूर्ण अन्तरक्रियाका लागि महत्वपूर्ण मञ्च प्रदान गरेको छ । यसमार्फत उम्मेदवारहरूले आफ्नो सीप प्रदर्शन गर्ने र रोजगारदाताले आफ्नो संस्थालाई सुदृढ बनाउन सक्षम प्रतिभा पहिचान गर्ने मौका पाएका छन् ।

यो कार्यक्रमको सफल सञ्चालन संस्थाको व्यावसायिक विकास प्रवद्र्धन गर्ने तथा कर्पोरेट क्षेत्रसँग सुदृढ सहकार्य निर्माण गर्ने प्रतिबद्धताको झलक हो । यो ऐतिहासिक पहललाई भव्य रुपमा सफल बनाउन सहयोग गर्ने सहभागी रोजगारदाता तथा उम्मेदवारलाई संस्थाले हार्दिक आभार व्यक्त गरेको छ । भविष्यमा हुने प्लेसमेन्ट कार्यक्रमहरूमार्फत आकांक्षी पेशाकर्मीहरूको करिअर विकासलाई अझ सशक्त बनाउने अपेक्षा आइक्यानको छ ।

प्रकाशित समय : १६:०८ बजे