एक दर्जनभन्दा बढी पटक उपाधि आफ्नो पोल्टामा पारिसकेको स्पेनिस ‘पावर हाउस’ रियल म्याड्रिड बलियो प्रतिद्वन्द्वी म्यानचेस्टर सिटीलाई स्तब्ध पार्दै यूईएफए च्याम्पियन्स लिग फूटबल प्रतियोगिताको क्वार्टरफाइनलमा पुगेको छ ।

रियल म्याड्रिडले बुधबार बिहान सम्पन्न प्रि–क्वार्टरफाइनल खेलको दोस्रो लेग खेलमा इङ्लिस प्रिमियर लिग क्लब म्यानचेस्टर सिटीलाई २–१ गोलले हरायो । उक्त जितसँगै रियल म्याड्रिड ५–१ कुल गोल भिन्नताका आधारमा क्वार्टरफाइनलमा पुगेको हो ।

यसअघि खेलिएको प्रि–क्वार्टरफाइनलको पहिलो लेग खेलमा रियल म्याड्रिडले म्यानचेस्टर सिटीलाई ३–० गोलले हराएको थियो । दोस्रो लेग खेलमा रियल म्याड्रिडको सजिलो जितमा भिनिसियस जुनियर नायक बने ।

उनले दुवै हाफमा १/१ गोल गरे । खेल शुरू भएको २२औं मिनेटमा उनले पेनाल्टीमार्फत पहिलो गोल गरेका थिए । दोस्रो हाफको इन्जुरी समयको तेस्रो मिनेटमा उनले नै टोलीका लागि दोस्रो गोल थपेका थिए ।

म्यानचेस्टर सिटीका लागि भने एकमात्र गोल निर्धारित समयको ४१औं मिनेटमा एर्लिङ हालान्डले फर्काएका थिए । रियल म्याड्रिडले हालसम्म सर्वाधिक १५ पटक च्याम्पियन्स लिगको उपाधि जितिसकेको छ ।

प्रकाशित समय : ११:२४ बजे