बङ्गलादेशमा फेब्रुअरीमा हुने निर्वाचनअघि आफ्नो राजनीतिक प्रभाव बढाउने प्रयास गर्दै अफगान तालिबान अधिकारीहरूले बङ्गलादेशको भ्रमण गरी इस्लामिक नेताहरूसँग भेट गरेका छन् ।

बङ्गलादेश–अफगानिस्तान चेम्बर अफ कमर्शका अध्यक्ष अबु सायेम खालिदले काबुलको विदेश मन्त्रालयका महानिर्देशक नूर अहमद नूरको भ्रमणले व्यापारिक सम्बन्ध विस्तार गर्न मद्दत गरेको बताए ।

इस्लामवादी खेलाफात–ए–मजलिश पार्टीका नेता मामुनुल हकले एक हप्ताको बङ्गलादेश भ्रमणका क्रममा नुर मदरसाको पनि भ्रमण गरेका छन ।

“यो एक शिष्टाचार भेट थियो, हामी यहाँको सबैभन्दा ठूला मदरसाहरूमध्ये एक चलाउँछौं,” हकले भने । भ्रमणका क्रममा हकले अन्य केही मदरसाको पनि भ्रमण गर्नुभएको थियो ।

नोबेल शान्ति पुरस्कार विजेता मोहम्मद युनुस नेतृत्वको बङ्गलादेशको अन्तरिम सरकारले यस विषयमा कुनै टिप्पणी गरेको छैन । विदेश मन्त्रालयका एक अधिकारीले नाम नबताउने शर्तमा नूरको भ्रमण ‘व्यक्तिगत’ भएको बताएका छन् ।

बहुसंख्यक सुन्नी मुस्लिम रहेको र १७ करोड जनसङ्ख्या भएको बङ्गलादेशले सन् २०२४ मा तत्कालिन प्रधानमन्त्री शेख हसिनालाई सरकारबाट अपदस्थ गरेको जनविद्रोहपछि पहिलो पटक चुनावको तयारी गरिरहेको छ ।

मुस्लिम ब्रदरहुडसँग वैचारिक रूपमा आबद्ध देशको सबैभन्दा ठूलो र सबैभन्दा सङ्गठित इस्लामिक पार्टी जमात–ए–इस्लामीले हसिनाको १५ वर्षे शासनकालमा वर्षौंको प्रतिबन्ध र दमनपछि औपचारिक राजनीतिमा फर्कन खोजेको छ।

व्यापक मानवअधिकार उल्लङ्घनका लागि दोषी ठहर गरिएकी हसिनाले इस्लामवादी आन्दोलनविरुद्ध कडा नीति लिएका थिए । आतङ्कवादविरुद्धको सुरक्षा अभियानको निरीक्षण गर्ने क्रममा धेरै कट्टर इस्लामबादी बङ्गलादेशी नागरिक मारिएका र सयौँ पक्राउ परेका थिए ।

तालिबानको प्रतिबन्धित लडाकू समूह हर्कत–उल–जिहाद अल–इस्लामीको बङ्गलादेशसँग लामो समयदेखि सम्बन्ध थियो, जसका केही सदस्यहरूले अफगानिस्तानमा सोभियत सेनाविरुद्ध लडेका थिए ।

इस्लामिक स्कुल र मुस्लिम सङ्गठनको प्रभावशाली गठबन्धन हिफाजत–ए–इस्लामका नेताहरुले गत सेप्टेम्बरमा अफगानिस्तानको भ्रमण गरेका थिए ।

ढाकाको प्रोथम आलो पत्रिकासँग कुरा गर्दै उनीहरूले ‘नियममा आधारित समाज’ को रूपमा त्यहाँ देखेको कुराको प्रशंसा गरे ।

विश्वको चौथो सबैभन्दा बढी मुस्लिम बहुल देश बङ्गलादेश इस्लामिक अभ्यासका विविध पक्षहरूको घर हो, जसमा कट्टरपन्थी इस्लामवादीहरूले प्रायः निन्दा गर्ने महत्वपूर्ण सुफी समुदाय पनि समावेश छ ।

बङ्गलादेशमा सानो शिया समुदाय पनि छ । यहाँका लगभग १० प्रतिशत बङ्गलादेशीहरू मुस्लिम छैनन् । उनीहरू मुख्यतया हिन्दू र इसाई र अन्य धर्ममा विश्वास गर्छन् ।

प्रकाशित समय : २१:१५ बजे