भुटानमा जारी एएफसी यू–२० महिला एसियन कप छनोटमा नेपालले पहिलो जित दर्ता गरेको छ । थिम्पुस्थित चाङलिमिथाङ स्टेडियममा शुक्रबार भएको खेलमा नेपालले साउदी अरेबियामाथि १-० को साँधुरो जित निकालेको हो ।

साउदीविरुद्ध सुरुवातबाटै दबाब बनाएपनि गोल गर्न भने नेपालले ९० औं मिनेसम्म कुर्नु परेको थियो । पूर्णिमा राईले वानटचमा गोल गर्दै नेपाललाई महत्वपूर्ण ३ अंक दिलाइन् ।

नेपाल खेलको ३८औं मिनेटमा पेनाल्टीमा गोल गर्न भने चुकेको थियो । मीना देउवाले प्रहार गरेको बल पोलमा लागेर फर्केको थियो । रिबाउन्डमा पनि गोल गर्न नसकेपछि नेपाल पहिलो हाफमा नै अग्रता बनाउनबाट असफल भएको थियो ।

नेपालले आफ्नो पहिलो खेलमा भुटानसँग १–१ गोलको बराबरी खेलेको थियो । शुक्रबारको जितपछि नेपालको चार अंक भएको छ ।

आफ्नो पहिलो खेलमा उत्तर कोरियासँग १५–० को फराकिलो हार बेहोरेको साउदी अरेबियाको एसियन कपमा छनोट हुने सम्भावना सकिएको छ ।

प्रकाशित समय : १६:१२ बजे