सातदोबाटो ललितपुरस्थित सगरमाथा स्वीम क्लबले अन्तर्राष्ट्रियस्तरका पौडी खेलमा सहभागी भएका युवा खेलाडीलाई सम्मान गरेको छ ।

अन्तर्राष्ट्रिय खेलाडी सम्मानसँगै स्वीम क्लबले पौडी खेलाडीका लागि क्षमता अभिवृद्धिको कार्यक्रम पनि आयोजना गरेको छ ।

सम्मान पाउने खेलाडीमा उपास्ती महर्जन, सेरेन सिंह, एल्भिन महर्जन, लिसन डंगोल महर्जन, आरजू थापा मगर, विशाखा महर्जन, काव्या श्रेष्ठ र अजलकाजी ताम्राकार छन् ।

सम्मान पाउने खेलाडीहरूले देशभित्र र देशबाहिर भएका पौडी खेलका विभिन्न प्रतियोगितामा सहभागिता जनाई उत्कृष्ट प्रदर्शन गर्दै आएका छन् ।

खेलाडीलाई अन्तर्राष्ट्रिय पौडी परिसरका प्रमुख तिलकबहादुर नेपालीले सम्मानपत्र प्रदान गरे । सम्मान कार्यक्रमपछि, उपस्थित भएका साना बालबालिका र युवा खेलाडीलाई मनोसामाजिक परामर्शदाता तानिया राठीले खेलप्रति विद्यार्थीको हौसला बढाउन र मनोबल उच्च बनाइराख्न तालिम प्रदान गरिन् ।

उनले बालबालिका र युवामा पौडीजस्तो खेलले अनुशासन, लगनशिलता र आत्मविश्वास बढाउनुका साथै नियम, समयसीमा र समय तालिका अनुसार काम गर्ने बानी बसाल्न प्रेरित गर्ने हुँदा दैनिक जीवनमा पौडी खेललाई सक्दो समावेश गर्नुपर्ने बताइन् ।

दैनिक शारीरिक अभ्याससँगै मानसिक रूपमा पनि ताजा र स्फूर्त रहन खेलले सहयोग गर्ने हुँदा हरेक अभिभावकले आफ्ना बालबालिकाको इच्छा अनुसार उनीहरूले रुचि राख्ने कुनैपनि खेलकुदको विधा छान्न र त्यसैमा निरन्तर लाग्न सुझाव दिइन् ।

कार्यक्रममा क्लबका सचिव धन विक्रम केसीले पौडी खेलले बालबालिकाको शारीरिक र मानसिक विकासमा महत्त्वपूर्ण भूमिका खेल्ने भएकाले पौडी खेलमा बालबालिकाको सहभागिता बढाउन सगरमाथा स्वीम क्लबले विशेष पहल गर्ने बताए ।

क्लबका संरक्षक एवं राष्ट्रिय पौडी प्रशिक्षक रत्नलाल महर्जनले आफूले सिकाएका खेलाडीले देशभित्र र देशबाहिर भएका प्रतियोगितामा उत्कृष्ट प्रदर्शन गर्दै आफ्नो आत्मविश्वास, मिहिनेत र लगनशीलताका कारण आफ्नो परिवार, समाज र देशको नाम समेत उच्च बनाएकोमा खुसी व्यक्त गरे ।

अन्तर्राष्ट्रिय पौडी परिसरका प्रमुख नेपालीले मिहिनेत र लगनशील पौडी खेलाडी र खेलाडीलाई उत्कृष्ट प्रदर्शन गर्न हौसला प्रदान गरिरहने अभिभावकको पनि प्रशंसा गरे । पौडी खेल र खेलाडीको क्षमता अभिवृद्धिका लागि आफू सधैं उपलब्ध रहने र आवश्यक सहयोग गर्ने उनको प्रतिबद्धता छ ।

प्रकाशित समय : १४:५० बजे