सरकारले चालू आर्थिक वर्षको १० महिनाको अवधिमा ३ खर्ब ९० अर्ब ऋण लिएर ३ खर्ब ८ अर्ब ऋण तिरेको छ ।

सार्वजनिक ऋण व्यवस्थापन कार्यालयको मासिक प्रतिवेदन अनुसार चालू आर्थिक वर्षको साउन देखि वैशासम्ममा सरकारको कुल तिर्न बाँकी २६ खर्ब २२ अर्ब ४० करोड ३७ लाख रहेको छ ।

सरकारले चालू आर्थिक वर्षमा ५ खर्ब ४७ अर्ब सार्वजनिक ऋण परिचालन गर्ने लक्ष्य राखेकोमा वैशाख मसान्तसम्ममा ३ खर्ब ९० अर्ब ८३ करोड ऋण प्राप्ति गरेको छ ।

वार्षिक लक्ष्यको आधारमा कुल सार्वजनिक ऋण प्राप्ति ७१.४५ प्रतिशत छ । यस अवधिमा सरकारले ३ खर्ब १ अर्ब १४ करोड आन्तरिक ऋण तथा ८९ अर्ब ६८ करोड बाह्य ऋण प्राप्ति गरेको छ ।

यस्तै, चालु आर्थिक वर्ष २०८१/८२ मा ऋण सेवा खर्चमा ४ खर्ब २ अर्ब वार्षिक बजेट रहेकोमा वैशाख मसान्तसम्म ३ खर्ब ८ अर्ब १४ करोड भुक्तानी भएको छ ।

प्रकाशित समय : १८:०० बजे