प्रदेश २ सरकारले स्वास्थ्य निर्देशनालयमार्फत जनकपुरको जानकी मेडिकल शिक्षण अस्पताल र वीरगन्जको नेसनल मेडिकल कलेज शिक्षण अस्पतालमा आइसोलेसनको व्यवस्था गरेको दाबी गरे पनि उपकरण अभावमा आशंका गरिएका संक्रमितलाई समेत भर्ना लिएको छैन । स्वास्थ्य निर्देशनालयका डा. विजय झाले जानकीमा २० शय्या आइसोलेसनसहित ६० शय्या क्वारेन्टाइन र नेसनलमा ५० शय्या आइसोलेसनसहित ८० शय्या क्वारेन्टाइनका लागि व्यवस्था गरेको  दाबी गर्दै आएका छन् ।

कोरानासँग सम्बन्धित बिरामीको बारेमा समन्वय गर्न गठित समितिमा मेडिकल कलेज सञ्चालक बसरुद्दिन अन्सारी नै सदस्य छन् । तर, अस्पतालमा संक्रमितको उपचारमा खटिने डाक्टर र नर्सहरुका लागि आवश्यक पर्ने पिपिई, टेस्ट किट, ग्लोब्स, मास्कलगायतका सामग्री अभावले गर्दा भर्ना नलिइएको जानकी मेडिकल कलेजका प्रशासन प्रमुख विनोद साहले बताए ।

अस्पताल प्रशासनका अनुसार चैत १२ गते टेकु अस्पताल काठमाडौंबाट रिफर भएर कोरोना संक्रमित व्यक्ति पनि आएका थिए । ‘तर यहाँ संक्रमित हुने व्यक्तिको उपचारको कुनै सुविधा नभएकाले धरान पठायौं,’ प्रमुख साहले भने ।

प्रशासन प्रमुख साहले अस्पतालमा आन्तरिक तयारी भइरहेको दाबी गर्न भने छाडेनन् । ‘हामीले अहिले अस्पताल आउने बिरामीलाई ओपिडी सेवा दिइरहेका छौं,’ उनले भने । तर, यथार्थमा हिजोआज जानकी मेडिकल कलेज र प्रादेशिक अस्पताल जनकपुरले ज्वरो आएका बिरामीको समेत परिक्षण नगरिरहेको स्थानीय बताउँछन् । कोरोनाभाइरस संक्रमणको आंशका हुनेबित्तिकै जनकपुरबाट काठमाडौंका लागि एम्बुलेन्समा राखेर पठाउने गरिएको छ ।

जानकी मेडिकल कलेज शिक्षण अस्पतालमा कोरोना लक्षण भएका बिरामी आउनेक्रम बढेपछि अस्पतालले एम्बुलेन्सबाट समेत झर्न नदिएर काठमाडौं वा धरान पठाउने गरेको छ । प्रदेश २ का स्वास्थ्य निर्देशनालका निर्देशक डा. हरिश्चन्द साहले बिरामी परीक्षण गर्दा डाक्टर र नर्सले लगाउनुपर्ने आवश्यक सामग्री र बिरामी परीक्षण गर्न आवश्यक सामग्री केन्द्र सरकारसँग माग गरिएको बताए । स्वास्थ्यकर्मीहरूले भने आफूहरूका लागि आवश्यक प्रोटेक्टेट सामग्री जिल्लामा नभएका कारण जोखिम मोलेर काम गर्न नसक्ने बताउँदै आएका छन् ।

थाइराइडका बिरामीलाई ज्वरो आएपछि ‘अस्पतालबाटै भगाइयो‘

यसैबीच, नेसनल मेडिकल कलेजमा भर्ना भएका एकजना थाइराइडका बिरामीलाई ज्वरो आएपछि डाक्टरले अस्पतालबाटै भगाएको पाइएको छ । अस्पतालबाट बिरामी भगाएको भिडियोसमेत सार्वजनिक भएपछि अस्पताल प्रशासनको चौतर्फी विरोध भइरहेको छ ।

प्रदेश सरकारले नेसनल मेडिकल कलेजमा कोरोना संक्रमित व्यक्तिको उपचारका लागि व्यवस्था गरेको दाबी गर्दै आएका बेला यस्तो घटना बाहिरिएको हो । वीरगन्जकै नारायणी अस्पतालका एकजना डाक्टरले भने, ‘टाइफाइड, पिसाब संक्रमणलगायत समस्याका कारण ज्वरो आएका बिरामीलाई समेत नेसनल मेडिकल कलेजले फर्काउने गरेको छ । सबै बिरामी सरकारी अस्पतालमै आउने गरेका छन् ।’

प्रकाशित समय : १९:२३ बजे