इजरायली सेनाले मध्य गाजाको विद्यालयमा बिहीबार गरेको हवाई आक्रमणमा कम्तीमा १७ जनाको मृत्यु भएको छ । आक्रमणमा ४२ जना घाइते भएका अल–अव्दा अस्पतालका अधिकारीहरूलाई उद्धृत गर्दै सीएनएनले जनाएको छ ।

नुसेरात शरणार्थी शिविरमा रहेको अल–शुहादा विद्यालयमा इजरायली सुरक्षा बल (आईडीएफ) ले हवाई आक्रमण गरेको हो । आक्रमणमा मारिएकामध्ये अधिकांश बालबालिका र वृद्ध छन् ।

आईडीएफले आइतबार उत्तरी गाजामा गरेको आक्रमणमा कम्तीमा ८५ जना मारिएका थिए । आईडीएफका पछिल्ला आक्रमणका कारण उत्तरी गाजा लगायतका क्षेत्रमा दूरसञ्चार र इन्टरनेट सेवा अवरुद्ध भएको जनाइएको छ ।

गाजामा एक वर्षयताको इजरायली आक्रमणमा कम्तीमा ४३ हजार जनाको ज्यान गइसकेको छ । दसौं हजार घाइते छन् ।

सन् २०२३ को अक्टोबर ७ मा हमासले दक्षिणी इजरायलमा गरेको आक्रमणमा १२ सय जना मारिएका थिए । त्यसका साथै, हमासले २५१ जनालाई बन्धक बनाएर लगेको थियो । त्यसयता इजरायलले गाजामा निरन्तर आक्रमण गर्दै आएको छ ।एजेन्सी

प्रकाशित समय : १७:३३ बजे