नेपाल राष्ट्र बैंकको तथ्याङ्क अनुसार बैंक तथा वित्तीय संस्थाले मङ्सिर मसान्तसम्ममा सुनचाँदी धितोमा ५१ अर्ब ७६ करोड ९४ लाख रुपैयाँ कर्जा प्रवाह गरेका छन् । गत कार्तिकसम्म ५१ अर्ब ३९ करोड ८० लाख रूपैयाँ कर्जा प्रवाह गरेका बैंकहरुले मङ्सिरमा मात्रै ३७ करोडले कर्जा बढाएका हुन् ।

पछिल्ला दिनहरुमा सुनचाँदीको मूल्यले नयाँ रेकर्ड कायम गरिरहँदा बैंक तथा वित्तीय संस्थाहरूले पनि सुनचाँदी धितोमा कर्जा प्रवाह बढाएका हुन् । घरजग्गाजस्तै सुनचाँदी पनि सबैभन्दा सुरक्षित घितोको रूपमा लिइने भएकाले पछिल्लो समय सुनचाँदी धितोमा प्रवाह हुने कर्जा बढेको हो ।

नेपाल सुनचाँदी व्यवसायी महासंघका अनुसार माघ २ गते मंगलबार नेपाली बजारमा छापावाल सुन प्रतितोला १ लाख १९ हजार ४०० रूपैयाँमा कारोबार भएको छ । यस्तै तेजावी सुन प्रतितोला १ लाख १८ हजार ८५० रूपैयाँमा कारोबार भएको छ । चाँदी भने प्रतितोला १ हजार ४१५ रूपैयाँमा कारोबार भएको छ ।

राष्ट्र बैंकका अनुसार बैंक तथा वित्तीय संस्थाले २०७९ मङ्सिर मसान्तसम्ममा सुनचाँदी धितोमा ५१ अर्ब ९ करोड १९ लाख रुपैयाँ कर्जा प्रवाह भएको थियो । यो कर्जा गतवर्षको सोही अवधिको तुलना (वार्षिक बिन्दुगत रुपमा) मा ७९ करोड ५० लाख रूपैयाँले बढी हो ।

प्रकाशित समय : १४:०२ बजे