‘आइरन गेट’ पछि ‘गोल्डेन गेट’ भन्दै ठूला–ठूला होर्डिङ बोर्ड राखेर तामझाम देखाउने काठमाडौंको गोल्डेन गेट कलेज विद्यार्थी मारा निस्किएको छ । हुनेखानेबाट ठूलो मुठो तान्न पल्किएको यो कलेजले छात्रवृत्ति पाएका गरिब जेहन्दार विद्यार्थीबाट पनि असुल्न नछोडेपछि शिक्षाको नाममा धन्दा चलाएको यसको अश्लियत उदाङगिएको छ ।

काठमाडौं महानगरका मेयर बालेन शाहले छात्रवृत्तिमा छनोट गरि पढ्न पठाएका विद्यार्थीलाई यो कलेजले टर्चर दिन सुरु गरेको छ । महानगरले सञ्चालन गरेको छात्रवृत्ति परीक्षामा पास भएर पढ्न गएका विद्यार्थीसँग गोल्डेनगेट इन्टरनेशनल कजेलले पैसा माग्न थालेपछि अहिले विद्यार्थी तनावमा छन् । महानगरले पनि विद्यार्थीको गुनासो सुन्न छोडेको छ । महानगर र कलेज दुवैसँग संवाद गर्दा पनि आफुलाई मानसिक तनावमात्रै दिने काम भएको गुनासो विद्यार्थीले गरेपछि हामीले महानगरसँग जवाफ माग गरेका थियौं । तर महानगर यो विषयमा बोल्नै चाहेन । यता कलेजले ‘हामी बालेनलाई टेर्दैनौं, तिमि जेसक्छौं गर’ भन्नेशैलीमा विद्यार्थीलाई दबाब लिएर पैसा उठाउन खोजिरहेको छ ।

अछाम घर भएका लोकेश रावल काठमाडौंको मैतिदेवीमा बस्छन् । मध्यबानेश्वरस्थित रत्नराज्य स्कुलबाट माध्यामिक शिक्षा पुरा गरेका यीनलाई एसईईपछि कहाँ र कसरी पढ्ने तनावले सताएको थियो । दुर्गमबाट काठमाडौं बसेर पढ्दाको चुनौती सानो थिएन । आर्थिक अभावदेखि काठमाडौंको महंगो बसाईमै उच्चशिक्षा हासिल गर्नुपर्ने बाध्यताकाबीच गत असार २२ गते बालेनले एक सूचना जारी गरेपछि खुशी मिलेको थियो । अर्थात् यसअघि कलेजले आफ्नो अनुकुल दिँदै आएको छात्रवृत्ति यसपटक महानगरले छनोट गर्ने भएको थियो । त्यो पनि कुनै पहुँच वा भनसुनबाट नभई निष्पक्ष परीक्षा प्रणालीबाट । लोकेशले महानगरले लिएको छात्रवृत्ति परीक्षा पनि दिए । मानविकी संकायतर्फ एक नम्बरमा नाम निकाले । जहाँ उनले ४९ नम्बर ल्याएर परीक्षा उत्तिर्ण गरेका छन् ।

परीक्षा उत्तिर्ण भएपछि उनको रोजाई बत्तिसपुतलीको गोल्डेनगेट इन्टरनेशनल कजेल बन्यो । मैतिदेवीमा बस्दै आएका उनलाई नजिक पनि पर्ने र आउन जान सजिलो हुने भएपछि गोल्डेन छनोट गरेका थिए । महानगरले त्यही अनुसार पत्र पनि काटिदियो । जसमा भर्ना शूल्क, ट्युसन शूल्क, सुरक्षा जम्मासहित कक्षा ११ र १२ मा लाइब्रेरी शूल्क पनि नलाग्ने उल्लेख गरिएको छ । अर्थात् उनी निशुल्क रुपमै पढ्न पाउने उल्लेख छ ।

यतिबेलासम्म कुनै समस्या भएन । महानगरले दिएको पत्र लिएर उनी गोल्डेनगेटको कक्षा ११ मा भर्ना पनि भए । तर अहिले झण्डै दुईमहिनापछि कजेलले शूल्क माग्न थालेको छ ।यतिबेला लोकेशको परीक्षा चलिरहेको छ । तर सुरुमै १० हजार माग्दा नदिएपछि प्रवेश पत्र नै दिएको छैन । दैनिकी पास लिएर उनी परीक्षा दिइरहेका छन् ।बुधबार हामीले कलेजमै पुगेपछि लोकेशले प्रवेश पत्र पाएको बताएका छन् । तर पैसा नभई पढाई नहुने भन्दै दबाब दिन छोडेको छैन ।

अहिले लोकेशसँगमात्रै कलेजले विभिन्न शिर्षक राखेर ८१ हजार शुल्क बुझाउन सूची दिएको छ । लोकेशमात्रै नभएर महानगरबाट छात्रवृत्तिमा छनोट भइ गएका सबै विद्यार्थीलाई यो कलेजको व्यवहार यस्तै रहेको छ । यो कलेजले बालेनलाई नटरेको स्वीकार काठमाडौं महानगरकै कर्मचारीहरु गर्छन् । राजनीतिक पहुँचको बलमा विद्यार्थीबाट छात्रवृत्ति खोस्न सञ्चालक लागिपरेका छन् । गुनासो लिएर पुग्ने विद्यार्थीलाई लेखा प्रमुख सरोज पौडेलले थर्काएर फर्काउने गरेका छन् । उनले विद्यार्थीलाई गर्ने व्यवहार अपमान भन्दा कम छैन । हामीले उनीसँग जवाफ खोज्दा भेट्न मानेनन् । यो कजेल एमाले नेता रमेश कुमार सिलवालको हो । उनी राष्ट्रिय खेलकुद परिषद्का पूर्व सदस्यसचिव पनि हुन् । हामी पुग्दा सिलवालकी छोरी शैल सुमनले कसैसँग भेट्न पनि दिइनन् । उनले छात्रवृत्तिका विषयमा महानगर र कलेजबीच मापदण्ड बनाउन बाँकी नै रहेको बताइन् ।

काठमाडौं महानगरले लिएको छात्रवृत्ति परीक्षामा पहिलो लटमा मात्रै २ हजार २३ विद्यार्थी छनोट भएका थिए । उत्तिकै संख्यामा दोस्रो लटमा समेत विद्यार्थी सामेल भएका थिए । तर आफुले छनोट गरि पठाएका बिद्यार्थी अप्ठ्यारोमा परिसक्दासमेत महानगरले पहलकदमी लिएको छैन ।बालेन पनि मौन बसिँदिएका छन् । फलतः शक्तिको आँडमा कसैलाई नटेर्ने साँडे जस्तो बनेका सिलवालसहितका शिक्षा व्यापारीहरु असुलीधन्धा चलाइरहेका छन् । उनीहरु सबै एक हिसावले शैक्षिक माफिया पनि हुन् ।

०००