उच्च ओहोदामा पुगेर सबैभन्दा धेरै दुर्व्यवहार खेप्ने कोही नेता छन् भने सायद ती माओवादी केन्द्रका अध्यक्ष तथा प्रधानमन्त्री पुष्पकमल दाहाल ‘प्रचण्ड’ हुनुपर्छ । जनयुद्धमा बन्दुकको नालाबाट बालबाल बचेका प्रचण्डले गणतन्त्रमा धेरै पटक नागरिकको जुत्ता खाए । अहिले नेतामाथि जनताले जुता, मुक्का, कुर्सी हुँदै खुकुरीसम्मको आक्रमण सुरु भएको छ । यो वितृष्णाको उपज हो । कानुनी राज्यमा नाङगो खुकुरीको बलमा मन शान्त पार्ने छुट कसैलाई छैन । यद्यपी नागरिकले नेता नसच्चिएको भन्दै यही गलत बाटोलाई आक्रोश पोख्ने माध्यम बनाएका छन् ।

को–को परे आक्रमणमा ?

महेन्द्र यादव – पूर्वमन्त्री

नेपाली काँग्रेसका सहमहामन्त्री महेन्द्र यादवमाथि बुधबार काठमाडौंको व्यस्त ठाउँ भृकुटीमण्डपमा दिनदाहाडै खुकुरी प्रहार भयो । नुवाकोट घर भएका श्यामबहादुर सापकोटाले यादवमाथि खुकुरी प्रहार गरेका थिए । रिपोर्टस् क्लबको कार्यक्रममा सहभागी भएका सापकोटाले, यादवको भाषण सुनेपछि मौका छोपेर बाहिर निस्किए लगत्तै खुकुरी प्रहार गरेका थिए । सापकोटाले ज्यान लिने उदेश्यले खुकुरी प्रहार गरेको भएपनि छलेर बालबाल बचेका यादवको घाइते अवस्थामा ट्रमा सेन्टरमा उपचार भइरहेको छ । यादवमाथि खुकुरी प्रहार भएपछि नेताहरु माथिको आक्रमण श्रृखंला फेरि बल्झिएको छ । यो आक्रमणले बिर्सिएर खाटो बसेका पुराना घट्नाहरुलाई फेरि सम्झाएको छ ।

पुष्पकमल दाहाल ‘प्रचण्ड’ – प्रधानमन्त्री

माओवादी केन्द्रका अध्यक्ष तथा हालका प्रधानमन्त्री पुष्पकमल दाहाल प्रचण्डमाथि २०६९ साल मंसिर २ मा भौतिक आक्रमण भएको थियो । प्रचण्डलाई बागलुङका पूर्वमाओवादी लडाकु पदम कुँवरले झापड हानेका थिए । काठमाडौंको भृकुटीमण्डपमा आयोजना गरिएको चियापान कार्यक्रममा माला लगाइदिने भन्दै कुँवरले प्रचण्डलाई झापड हानेका थिए । कुँवरले प्रचण्डलाई झापड हान्दा उनको चस्मा नै फुटेको थियो । प्रचण्डलाइ झापड हान्ने कुँवर पछि २८ हजार धरौटी तिरेर अदालतबाट रिहा भए । कुँवर तिनै पात्र हुन्, जो पछि प्रचण्ड विरुद्धै चुनाव लडेर थप चर्चामा आए । प्रचण्डमाथिको आक्रमण यतिमात्रै सीमित भएन । प्रधानमन्त्रीमा तेस्रो इन्निङ पुरा गरेका प्रचण्डले जनताको जुता र झापडमा पनि ह्याट्रिक गरेका छन् । उनीमाथि दोस्रो पटक २०७६ साल फागुन १८ गते राष्ट्रियसभा गृहमा जुम्लाका रतन तिरुवाले जुता प्रहार गरे । तत्कालिन नेकपाका अध्यक्ष प्रचण्ड सहभागी कार्यक्रममा छिरेका तिरुवाले प्रचण्डको भाषण मन नपरेको भन्दै जुत्ता खोलेर हानेका थिए । प्रचण्डमाथि आक्रमणको श्रृखंला यही रोकिएन । उनीमाथि २०७९ कार्तिक २२ गते सुर्खेतमा फेरि जुत्ता प्रहार भयो । चुनावी सम्बोधनका लागि सुर्खेत पुगेका प्रचण्डमाथि पूर्वमाओवादी लडाकुसमेत बताउने कमल खत्रीले जुत्ता प्रहार गरेका थिए ।

रामचन्द्र पौडेल – राष्ट्रपति

हालका राष्ट्रपति तथा तत्कालिन सभामुख रामचन्द्र पौडेलमाथि २०५१ सालमा संसदमै जुत्ता प्रहार भएको थियो । एमालेको तर्फबाट राष्ट्रिय सभामा सदस्य रहेका गोल्छे सार्कीले पौडेलमाथि जुत्ता प्रहार गरेका थिए । नेतामाथिको जुत्ता प्रहारमध्येको यो बहुचर्चित घटना हो ।

केपी शर्मा ओली – अध्यक्ष, नेकपा एमाले

नेकपा एमालेका अध्यक्ष तथा पूर्वप्रधानमन्त्री केपी शर्मा ओलीमाथि गएको वैशाख १३ गते कोशी प्रदेशमा आक्रमणको प्रयास भयो । बुद्धशान्ति गाउँपालिकामा आयोजित एमालेको कार्यकर्ता भेलालाई सम्बोधन गर्न पुग्दा पहिचानवादीहरुले उनीमाथि ढुंगामुढा गरे । सम्भवतः गृहजिल्ला झापा पुग्दा पहिलोपटक उनले कालोझण्डा र ढुंगामुढाको सामना गर्नू परेको थियो । ओलीलक्षित पहिचानवादीहरुको ढुङगा उनलाई नभएर प्रहरी सुरक्षाकर्मीलाई लागेको थियो ।

झलनाथ खनाल – पूर्वप्रधानमन्त्री

पूर्वप्रधानमन्त्री तथा नेकपा एकीकृत समाजवादीका सम्मानित नेता झलनाथ खनाल पनि कार्यकर्ताको निशानामा परेका छन् । २०६७ साल माघ ७ गते तत्कालीन एमाले अध्यक्ष खनालमाथि हातपात भएको थियो । सुनसरीमा एमालेकै कार्यकर्ता देवीप्रसाद रेग्मीले खनाललाई झापड हानेका थिए । रेग्मीले झापड हान्दा खनालको चश्मा खसेको थियो । रेग्मी २०४६ देखि एमाले कार्यकर्ता थिए । अचम्मको संयोग नै भन्नुपर्छ, झापड खाएको १५ दिनछि खनाल प्रधानमन्त्रीसमेत बनेका थिए ।

सुशिल कोइराला – पूर्वप्रधानमन्त्री

दिवंगत नेता सुशिल कोइरालालाई २०६९ साल असोज १३ गते आफ्नै कार्यकर्ताले कुर्सी प्रहार गरेका थिए । कुर्सी लागेर कोइरालाको शरीरको बायाँ भागमा सामान्य चोट लागेको थियो । काठमाडौंको कपनमा आयोजित क्षेत्रीय कार्यक्रममा काँग्रेसको विद्यार्थी संगठन नेविसंघका प्रवेश बस्नेतले कोइरालामाथि कुर्सी प्रहार गरेका थिए ।

डा. बाबुराम भट्टराई – पूर्वप्रधानमन्त्री

नेपाल समाजवादी पार्टीका अध्यक्ष तथा पूर्वप्रधानमन्त्री डा. बाबुराम भट्टराईमाथि २०७३ साल मंसिर २२ गते पोखरामा जुत्ता प्रहार भएको थियो । नयाँ शक्ति पार्टीका संयोजक रहेका बेला पोखराको पृथ्वीनारायण क्याम्पसमा आफूनिकट विद्यार्थी संगठनले आयोजना गरेको कार्यक्रमलाई सम्बोधन गर्दैगर्दा उनीमाथि कैलालीका ३४ वर्षीय सञ्जिव भट्टराईले जुत्ता प्रहार गरेका थिए ।

झक्कु सुवेदी – माओवादी नेता

माधवकुमार नेपाललाई काठमाडौंबाट चुनाव हराएर चर्चामा आएका माओवादी नेता झक्कुप्रसाद सुवेदीमाथि २०६८ साल बैशाख १९ गते चिया पसलमा थप्पड प्रहार भयो । सुवेदीलाई गोर्खा गाईखुका प्रेमराज देवकोटाले गालामा दुई झापड हानेका थिए । संविधानसभाको बैठक सकेर घर फर्कंदै गरेका उनलाई तीनकुनेमा चिया पसल गरेर बसेका देवकोटाले संविधान कहिले बनाउँछौ भन्दै झापड हानेका थिए ।

पूर्णबहादुर खड्का – रक्षामन्त्री

काँग्रेस उपसभापति एवम् हालका उप्रप्रधान तथा रक्षामन्त्री पूर्णबहादुर खड्का पनि चप्पल प्रहार खेप्ने नेताको सूचीमा पर्छन् । उनीमाथि २०६५ साल जेठ १५ गते चप्पल प्रहार भएको थियो । खड्कामाथि तत्कालीन एमालेकी सभासद् कमला शर्माले चप्पल प्रहार गरेकी थिइन् ।

डा. रामशरण महत – पूर्वअर्थमन्त्री

काँग्रेस नेता तथा पूर्व अर्थमन्त्री डा. रामशरण महतमाथि बोतल प्रहार भएको थियो । दुप्चेश्वर र तादी गाउँपालिका जोड्ने भुतखोल्चीमा २०७४ चैत १ गते पक्की पुलको शिलान्यास कार्यक्रममा पुगेका तत्कालिन अर्थमन्त्री महतमाथि पानीको बोतल प्रहार भएको थियो । उनलाई दुप्चेश्वर–३ का रामहरि खड्काले बोतल प्रहार गरेका थिए ।

मध्यदिनमै देशको संघीय राजधानीमा नेपाली काँग्रेसका नेता महेन्द्र यादवमाथि खुकुरी चलेपछि नेताहरु त्रसित बनेका छन् । आखिर नेतामाथि खुकुरी चल्ने अवस्था किन आयो ? अहिले चिया चौतारो हुँदै राजनीतिक दलभित्र छलफलको विषय बनेको छ । किनकि खुकुरी कुनै व्यक्तिगत लेनदेन वा रिसिबीका आधारमा चलेको थिएन । मञ्चमा उभिएर भ्रष्टाचारी नेताको संरक्षण गर्दै बोलेपछि आफुलाई रिस उठेर खुकुरी प्रहार गरेको बयान युवाले दिएका छन् । तथापी खुकुरी हान्नु कुनैपनि रुपले ठिक होइन, कानुनले दण्डित गरेको विषयलाई हामी कदापी सही मान्न सक्दैनन् । यसको सजाय उनले भोग्नैपर्छ । तर खुकुरी खाने अवस्था कसरी आयो ? यो चाहीँ गम्भीर विषय हो । सायद, सबै नियममा चलेको भए राम राज्य हुन्थ्यो । रावण राजमा जे भइरहेको छ, ठिक भइरहेको छैन । किनकि नेताहरु नै सच्चिदैनन् ।