मलेसियाको जोहोरबारुस्थित क्वाङ ली इन्डस्ट्रिज कम्पनीले दुई सय १० नेपाली श्रमिकलाई फर्कन दबाब दिएको छ । चर्चित अन्तर्राष्ट्रिय ‘सिमानो’ ब्रान्डका साइकल उत्पादन गर्ने कम्पनीले राजीनामा दिएर स्वदेश फर्कन दबाब दिइरहेको हो । कम्पनी व्यवस्थापनले लामो समय बेतलबी बिदामा बस्न वा कम्पनी छाडेर जान स्वैच्छिक राजीनामाका लागि दबाब दिएको पीडितहरूको भनाइ छ ।

नेपाली कामदारलाई काठमाडौंस्थित वर्ल्डवेज म्यानपावर (इन्क) कम्पनीले पठाएको थियो । कम्पनीमा नेपाली, बंगाली र म्यानमारका ५ सय श्रमिक कार्यरत छन् ।

लाखौं रकम तिरेर आएकाले ऋण नतिरी रित्तो हात स्वदेश फर्कन नसकिने पीडित श्रमिकहरूको भनाइ छ ।

कम्पनीले अहिले पनि दैनिक खानाबापत १३ रिंगेट र बसाइबापत मासिक ५० रिंगेट कटौती गरिरहेको छ । दुई कोठा र शौचालय भएको एउटा फ्याल्टमा १२ जनालाई राखिएको छ । उनीहरूका लागि पकाएर खाने किचन छैन । श्रमिकलाई निकाल्ने बहानामा ससानो गल्तीमा पनि कारबाही गर्न थालेको छ ।

आफूहरूले ठूलो रकम खर्चेर आएकाले कम्पनीले फिर्ता पठाउने भए त्यसको शोधभर्ना गर्नुपर्ने अडानमा श्रमिक छन् ।

नेपाली दूतावासले श्रमिकलाई जबर्जस्ती फिर्ता नपठाउन कम्पनीको व्यवस्थापन र मलेसियाको श्रम विभागसमक्ष आग्रह गरेको छ ।

प्रकाशित समय : ०८:२० बजे