गत साता सातै प्रदेश सरकारले आगामी आर्थिक वर्ष २०८०÷८१ को बजेट ल्याएका छन् । चालु आर्थिक वर्षको तलुनामा कतिपय प्रदेशले बजेट बढाएका छन् भने, केही प्रदेशले बजेट सन्तुलन गरेका छन् ।

कोशी प्रदेशमा भने बिहीबार नै बजेट ल्याइएको थियो । कोशीमा सरकार अल्पमतमा रहेका कारण अध्यादेशबाट बजेट ल्याएको हो । भने, मधेश, बागमती, गण्डकी, लुम्बिनी, कर्णाली र सुदूरपश्चिम प्रदेशसभामा सम्बन्धित मन्त्रीले शुक्रबार बजेट कार्यक्रममा प्रस्तुत गरेका हुन् ।

कोशीमा अर्थ मन्त्रालयको समेत जिम्मेवारी सम्हालेका मुख्यमन्त्री हिक्मतकुमार कार्कीले बजेट प्रस्तुत गरेका हुन् । अन्य प्रदेशहरूले प्रदेशसभामा बजेट प्रस्तुत गरे पनि कोशीमा भने प्रदेशसभाको अधिवेशन अन्त्य गरेर अध्यादेशबाट बजेट ल्याइएको हो ।

प्रदेशको बजेट यस्तो छ ?

कोशीः ३६ अर्ब २४ करोड ३५ लाख १० हजार

कोशी प्रदेशमा आगामी आर्थिक वर्ष २०८०÷८१ का लागि कुल ३६ अर्ब २४ करोड ३५ लाख १० हजारको बजेट ल्याइएको छ । त्यसमध्ये चालु खर्चतर्फ १४ अर्ब ३९ करोड ६२ लाख ६६ हजार, पुँजीगततर्फ १८ अर्ब २३ करोड ४२ लाख ५२ हजार र वित्तीय व्यवस्थापनतर्फ १ अर्ब विनियोजन गरिएको छ ।

मधेशः ४४ अर्ब ११ करोड ४६ लाख ३२ हजार

मधेशका अर्थमन्त्री संजय कुमार यादवले शुक्रबार प्रदेशसभामा आर्थिक वर्ष २०८०÷८१ को लागि ४४ अर्ब ११ करोड ४६ लाख ३२ हजारको बजेट प्रस्तुत गरे । त्यसमध्ये चालुतर्फ १८ अर्ब २१ करोड ७६ लाख १४ हजार (४१.३० प्रतिशत), पुँजीगततर्फ २५ अर्ब ६९ करोड ७० लाख १८ हजार (५८.२५ प्रतिशत) र वित्तीय व्यवस्थातर्फ २० करोड (०.५४ प्रतिशत) विनियोजन गरिएको यादवले ल्याएका छन् ।

यस्तै, प्रदेश सरकारले चालु आर्थिक वर्षभन्दा करिब ४ अर्ब कम अकारको बजेट ल्याएको हो । चालु आर्थिक वर्षमा प्रदेशमा ४६ अर्ब ९१ करोड ४८ लाख ८८ हजारको बजेट ल्याएको थियो । त्यसमध्ये चालु आर्थिक वर्षमा ६५ प्रतिशत बजेट मात्र खर्च हुने प्रदेश सरकारको अनुमान छ ।

बागमतीः ६२ अर्ब ७० करोड ९० लाख ७८ हजार

बागमतीका आर्थिक मामिला तथा योजनामन्त्री बहादुरसिंह लामाले शुक्रबार प्रदेशसभामा आर्थिक वर्ष २०८०÷८१ का लागि ६२ अर्ब ७० करोड ९० लाख ७८ हजार रुपैयाँको बजेट प्रस्तुत गरे । त्यसमध्ये चालुतर्फ २६ अर्ब ७० करोड २७ लाख ६९ हजार र पुँजीगततर्फ ३५ अर्ब ५० करोड ६३ लाख ९ हजार रुपैयाँ विनियोजन गरिएको छ ।

भने, चालु आर्थिक वर्ष २०७९÷८० मा बागमतीमा ७० अर्ब ९३ करोड ९२ लाख रुपैयाँ बजेट विनियोजन गरेको थियो । चालु आर्थिक वर्षको तुलनामा ८ अर्ब कमको बजेट ल्याइएको हो ।

गण्डकीः ३३ अर्ब ४२ करोड ७२ लाख

गण्डकीका आर्थिक मामिलामन्त्री जीतप्रकाश आलेले शुक्रबार प्रदेशसभामा आर्थिक वर्ष २०८०÷८१ का लागि ३३ अर्ब ४२ करोड ७२ लाख रुपैयाँको बजेट प्रस्तुत गरे । कुल बजेटमध्ये चालुतर्फ १२ अर्ब १३ करोड ६७ लाख रुपैयाँ (३८.१ प्रतिशत) र पुँजीगततर्फ २० अर्ब १९ करोड ६२ लाख रुपैयाँ (६०.४ प्रतिशत) र वित्तीय व्यवस्थातर्फ ५० करोड रुपैयाँ (१.५ प्रतिशत) छुट्याइएको छ ।

लुम्बिनीः ४० अर्ब ४७ करोड ९७ लाख

लुम्बिनीका आर्थिक मामिलामन्त्री धनबहादुर मास्कीले शुक्रबार प्रदेशभामा आगामी आर्थिक वर्ष २०८०÷८१ का लागि ४० अर्ब ४७ करोड ९७ लाख रुपैयाँको बजेट प्रस्तुत गरे । त्यसमध्ये चालुतर्फ १५ अर्ब ६३ करोड ३० लाख ९९ हजार र पुँजीगततर्फ २३ अर्ब २५ करोड ६९ लाख १ हजार रुपैयाँ विनियोजना गरिएको छ ।

कर्णालीः ३३ अर्ब ३७ करोड ९७ लाख ७ हजार

कर्णालीका आर्थिक मामिला तथा योजनामन्त्री बेदराज सिंहले प्रदेशसभामा आगामी आर्थिक वर्ष २०८०÷८१ का लागि ३३ अर्ब ३७ करोड ९७ लाख ७ हजार रुपैयाँको बजेट प्रस्तुत गरे । त्यसमध्ये चालुतर्फ ९ अर्ब २० लाख २४ हजार र पुँजीतर्फ १९ अर्ब ५७ करोड ७२ लाख ४३ हजार विनियोजन गरिएको छ ।

सुदूरपश्चिमः २९ अर्ब २६ करोड ५९ लाख

सुदूरपश्चिम सरकारले आर्थिक वर्ष २०८०÷८१ का लागि २९ अर्ब २६ करोड ५९ लाख रुपैयाँको बजेट प्रस्तुत गरे । त्यसमध्ये चालुतर्फ ९ अर्ब ५९ करोड रुपैयाँ र पुँजीगततर्फ १७ अर्ब २ करोड रुपैयाँ छुट्याइएको छ । सुदूरपश्चिममा चालु आर्थिक वर्ष २०७९÷८० का लागि ३६ अर्ब ७४ करोड ६४ लाख ६५ हजारको बजेट ल्याएको थियो ।

आकारका दृष्टिले बागमती प्रदेशको बजेट सबैभन्दा ठूलो छ । बागमतीमा कुल ६२ अर्ब ७० करोड ९० लाख ७८ हजार रुपैयाँको बजेट ल्याइएको छ । त्यस्तै सुदूरपश्चिम प्रदेशले ल्याएको बजेट आकारका दृष्टिले सबैभन्दा सानो छ ।

सुदूरपश्चिममा २९ अर्ब २६ करोड ५९ लाखको बजेट ल्याइएको छ । यसरी हेर्दा सुदूरपश्चिमको भन्दा बागमतीको बजेट दोब्बरभन्दा ठूलो छ ।

प्रकाशित समय : १४:३० बजे