ओशोधारा संघ नेपालका संयोजक आचार्यश्री ओशो अखण्ड यतिबेला बेलायत भ्रमणमा हुनुहुन्छ। बेलायत रहँदा पारिवारिक भेटघाट, विभिन्न स्थानको भ्रमणको साथै विभिन्न स्थान र मितिमा योगा तथा ध्यानका कार्यक्रमहरु पनि आयोजना भइरहेका छन्।

यसै शिलशिलामा युके मिच्चेटको तमुधी हलमा ६ मे (बैशाख २३ गते) शनिवारको दिन एक भव्य तथा उत्सवमय कार्यक्रम सु-सम्पन्न भएको छ । उक्त कार्यक्रमको संयोजन ओशोधारा संघ नेपालकी पुरानो तथा गहिरो साधिका, समाजसेवी शान्ती थापा (आचार्य करुणा सागर), पुरानो साधक स्वामी उदय कुँवर (स्वामी ध्यान बुद्ध) र सकुन गुरुङ लगायत गर्नुभएको थियो ।

उहाँहरुका अनुसार आचार्यश्री ओशो अखण्डको सानिध्यमा भएको उक्त योगा तथा ध्यान शिविर कार्यक्रम बिहान ७ बजेदेखि बेलुका ५ बजेसम्म संचालन भएको थियो । योगाको पहिलो सत्र स्वामी ध्यान बुद्ध (स्वामी उदय कुँवर)ले संचालन गर्नुभएको थियो भने अरु सबै ध्यान उत्सव तथा सत्सङ्ग आचार्यश्री ओशो अखण्ड आफैले गर्नुभएको थियो । अन्तिममा सहभागिको जिज्ञासा उपर प्रश्नोत्तर सत्सङ्ग र प्रतिक्रिया कार्यक्रम भएको थियो । सहभागीहरु यसबाट प्रभावित हुनुको साथै छिटोभन्दा छिटो अर्को कार्यक्रम आयोजना गर्ने प्रतिबद्धतासमेत सबैले जनाउनु भएको थियो ।

लब्ध प्रतिस्ठित सामाजिक व्यक्तित्वहरुको उपस्थितिमा भएको उक्त एक दिवसीय ध्यान शिविर सम्पन भए पश्चात् सहभागिले शान्त र आनन्दको महसुस गरेको कुरा आयोजक ओशोधारा संघ युकेले जानकारी गराएको थियो । कार्यक्रम भएको तमुधीहल बनाउन एनआरएन युकेले सहयोग स्वरुप २५० पाउण्ड उपलब्ध गराएको थियो । सहयोगको संयोजन अध्यक्ष सुनिल बाबु खडकाको निर्देशनमा उपाध्यक्ष शकुन गुरुङले गर्नुभएको थियो । साउण्ड सिस्टमको लागि इगंल्यान्ड राज्य परिषदका अध्यक्ष एलबी जेड गुरुङबाट १२० पाउण्ड सहयोग उपलब्ध भएको थियो । उहाँले पुरै अवधि ‘भोलेन्टिएर’ भएर भूमिकासमेत निर्वाह गर्नुभएको थियो ।

व्यस्त जिवनमा शारिरिक तथा मानसिक तनावबाट मुक्त भई खुशीयाल तथा आनन्दित जीवनयापन गर्न योगा तथा ध्यान कार्यक्रम अति आवश्यक मात्र नभई अनिवार्य नै भइसकेको छ । आचार्यश्री तथा गुरुको युके भ्रमणको अवसरमा यस्तो कार्यक्रम बारम्बार हुन सके सबैको लागि सुनौलो अवसर नै हुनेछ आयोजकको बुझाई छ । व्यस्त जिवनमा आउने दु:ख तथा सन्तापबाट मुक्त भई शान्त तथा आनन्दित जीवन जिउने अवसर पाउनु ध्यान साधनाका प्यासिहरुको लागि त झन महत्वको विषय बनेको छ ।

मिच्चेट तमुधिमा भएको उक्त कार्यक्रमको अलवा यहि मे ९ तारिखमा आएरल्याण्ड र मे २० तारिखको दिन लण्डन नजिक डार्डफोर्डमा यस्तै प्रयोगात्मक योगा तथा ध्यानको कार्यक्रम हुने जानकारी आयोजकबाट प्राप्त भएको छ । यस्ता कार्यक्रमहरु अरु केही महिना युकेको अन्य स्थानमा समेत हुने बुझिएको छ ।

प्रकाशित समय : २२:०६ बजे