काठमाण्डु– प्रधानमन्त्री बालेन शाह (बालेन) ले आफू कालो चश्मा लगाएरै प्रतिनिधिसभा बैठकमा उपस्थित हुने...

पुरा पढ्नुहाेस्

global ime bank Long Banner Ad

…तर प्रचण्डको मन पग्लिएन

50.67K
shares

जनयुद्धका सुप्रिमो, पुष्पकमल दाहाल ‘प्रचण्ड’ मंगलबार जुम्ला पुगे । सत्ता गठनबन्धनतर्फका उम्मेद्वारका लागि मत माग्न उनी जुम्ला पुगेको बुझ्न कठिन थिएन ।

स्वभाविक थियो, जुम्ला विमानस्थलमा हेलिकोप्टरबाट झर्नुअघि नै नेकपा माओवादी केन्द्रका सुप्रिमो प्रचण्डलाई स्वागत गर्नेको लामै लर्को देख्न सकिन्थ्यो । यही लर्कोेमा एक ब्यक्ति पनि थिए, जो त्यहाँ सयपत्रीको माला हातमा लिएर आफ्नो पार्टीका सुप्रिमोलाई स्वागत गर्ने तयारी ‘पोजिसन’मा थिए । ती ब्यक्ति अरु कोही नभएर माओवादी केन्द्रका नेता नरेश भण्डारी हुन् ।

प्रचण्डसहित सभालाई सम्बोधन गर्न जुम्ला पुगेका सबैजसोलाई नरेश औपचारिकता दर्शाइरहेका थिए । उनले बोलेको सहजै सुनिन्थ्यो, ‘जुम्लामा स्वागत छ ।’

स्वागतकै क्रममा प्रचण्ड जब नरेश नजिकै पुगे, टक्क रोकिए । प्रचण्डको नजर नरेशमाथि पर्‍यो । नरेशको नजर पनि आफ्ना पार्टी कमाण्डरमाथि पर्ने नै भयो । दुबैको आँखा चार भए । धेरै बेरसम्म एकआपसमा हेराहेर भयो । आँखा जुध्यो ।

यो हेराहेर र आँखा जुधाई सामान्य थिएन । यसले केही कथा भन्न खोजेको प्रतीत हुन्थ्यो । यो भेटले केही ब्यथा बयान गरिरहेको जस्तो लाग्थ्यो ।

यस्तो किन भयो ?

यो भेटघाटभित्र केही अन्तर्य लुकेको छ । जस्तो कि सबैजसो राजनीतिक दलहरुभित्र हुन्छ, उहीँ चुनावमा टिकट वितरण र गुटको राजनीति । कथा–ब्यथाको परकम्प यहीँबाट उठेको थियो ।

२०७४ को प्रदेशसभाको निर्वाचनले नरेशका लागि खुसी ल्याएको थियो । जुम्लाबाट विजयी भएका उनी कर्णाली प्रदेश सरकारको मुख्यमन्त्रीको दाबेदार थिए । चुनाव जिते पनि पार्टीभित्रको गुटगत राजनीतिमा नरेश एक्लो बृहस्पती जस्तो बने । जबकि माओवादी केन्द्रबाट निर्वाचित कालिकोटका महेन्द्रबहादुर शाही पार्टीभित्रको आन्तरिक गुट निर्माणमा बलियो देखिए ।

परिणाम के भइदियो भने यहीँ पार्टीभित्रको आन्तरिक द्वन्द्धको हुण्डरीमा परेर मुख्यमन्त्री पदको बलियो दाबेदार मानिएका ‘कर्नर’मा पारिए । उनी मुख्यमन्त्रीको दौडमा पछि परे । आन्तरिक मामिला तथा कानुन मन्त्रीमा चित्त बुझाउन बाध्य भए, उनी । अझ यसमाथि भइदियो के भने मन्त्री पदको आफ्नो कार्यकाल पनि पुरा गर्न दिइएन उनलाई ।

यी सबै प्रकरणमा स्वंयम पार्टी सुप्रिमोले पनि उनीमाथि वक्र दृष्टि राखे ।

राजनीतिको अर्को नाम धैर्यता हो भन्ने बुझेका नरेशका लागि ०७९ को चुनाव कुरेर बस्नुको विकल्प थिएन । तर, पार्टी अध्यक्ष प्रचण्डले नरेशलाई प्रदेश न त संघ कतैको पनि टिकट दिएनन् ।

माओवादी केन्द्रभित्र विकासको मोडल र माओवादबारे बुझाउने नेताका रुपमा कर्णाली भेगमा परिचित छन्, नरेश । तर पार्टी हाइकमाण्डले उनीमाथि ‘राजनीतिक हाराकिरी’ गरिदियो । परिणाम, अवसरबाट बन्चित गरेपछि जनताका समस्या र समाधानका योजनाहरु संसद्मा आफ्नै आवाजमा पु¥याउने उनको अभिलाषा अधुरै रहयो ।

अध्यक्ष प्रचण्डले एमाले अध्यक्ष केपी शर्मा ओलीले भीम रावल र घनश्याम भुषाललाई अपनाएको शैली नअपनाएको भए कुनै दुईमत थिएन, जुम्लाबाट टिकट पाउनेमा उनी पहिलो नम्बरमा थिए । उनको प्रभाव पनि उत्तिकै थियो । उनीभन्दा सिनियर नेता निवर्तमान प्रतिनिधिसभा सदस्य गजेन्द्रबहादुर महतले चुनाव नलड्ने घोषणा गरेपछि उनी बलियो विकल्प थिए । तर, ०६९ मा माओवादीबाट विद्रोह गरेकै कारण, माओवादी सही दिशामा आउनुपर्छ भनेकै कारण नरेशलाई प्रचण्डले जानीजानी दोस्रोपटक पछाडि धकेलेको आम बुझाइ छ ।

पहिलोपटक, नरेश मुख्यमन्त्रीको बलियो दाबेदार मात्रै थिएनन् तत्कालिन नेकपाका धेरै सांसद्को साथ पनि थियो । तर, उनलाई पाखा लगाएर प्रचण्डले मुख्यमन्त्री पद कालिकोटका महेन्द्र शाहीको पोल्टामा पारिदिए । जसबाट माओवादी केन्द्रकै सांसदले आन्तरिक रुपमा असन्तुष्टी जनाएका थिए । तर प्रचण्डको मन नपग्लिएपछि नतिजा नरेशको पक्षमा भइदिएन । दोस्रोपटकको मौकामा पनि पार्टी अध्यक्ष प्रचण्डले उनीमाथि पूर्वाग्रहको हथौडा ठोक्न असहज महसुस गरेनन् ।

जुम्लाको सभामा सम्बोधन गर्दै नेकपा माओवादी केन्द्रका अध्यक्ष प्रचण्ड । तस्बिर : विजयी रावत

 

तर, निष्ठा र सिद्धान्तको राजनीति गर्ने भनेर स्थानीय भेगमा चिनिएका नरेशले जुम्ला विमानस्थल प्राङ्गणमा खुला हृदयकासाथ प्रचण्डलाई पर्खिरहेका थिए, आफ्नै ठाउँमा फुलेको सयपत्री अर्थात ‘हजारी’को माला लिएर ।

हेलिकोप्टरबाट ओर्लनासाथ सुप्रिमो प्रचण्ड र नरेशका आँखाले धेरै कुरा बताइरहेको अनुमान गर्न सकिन्थ्यो । केही समयपछि मञ्चमा अध्यक्ष प्रचण्ड पुगे । उनको बोल्ने पालो आयो र आफ्नो चीरपरिचित अन्दाजमा भाषण ठोके, ‘माओवादी केन्द्रले सरकार बनाउँछ र त्यो सरकारमा जुम्लाले फुलमन्त्री पाउँछ ।’

तस्बिर क्रमशः अध्यक्ष प्रचण्ड, माओवादी केन्द्र कर्णाली प्रदेश इन्चार्ज कालीबहादुर मल्ल, माओवादी नेता नरेश भण्डारी र कांग्रेस नेतृ कान्तिका सेजुवाल । तस्बिर :  विजयी रावत

 

आफ्नो मन्तब्यको दौरान प्रचण्डले नरेशको काँधमा चुनाव जिताउने जिम्मेवारी रहेको आसय त प्रकट गरे तर नरेशको राजनीतिक जीवनमाथि भने प्रकाश पार्न चाहेनन् ।

र, नरेशसँग स्वागतका बेलामा जस्तै आँखा जुधाएर प्रचण्ड जुम्लाबाट बिदा भए । अर्को गन्तब्यतिर लम्किए । आफ्ना पार्टी सुप्रिमो आकाशमा उड्दै गर्दा नरेशको नजर एकटकले त्यहीँ उडिरहेको हेलिकप्टरमाथि केन्द्रित देखिन्थ्यो ।