भारतको विभिन्न राज्यमा भारी वर्षाका कारण आएको पहिरो तथा बाढीमा परी दर्जनाैंकाे मृत्यु भएको छ । भारतीय सञ्चारमाध्यमका अनुसार हिमाचल प्रदेश, झारखण्ड, ओडिशा तथा उत्तराखण्ड लगायतका राज्यमा बाढीपहिरोमा परेर ३१ जनाको मृत्यु भएको हो ।

पछिल्लो २४ घण्टामा हिमाचल प्रदेशमा मात्रै एकै परिवारका ८ सदस्यसहित २२ जनाको मृत्यु भएको छ । उत्तराखण्डमा लगातारको भारी वर्षाका कारण आएको बाढीमा परी चार जनाको मृत्यु भएको छ भने अन्य १० जना बेपत्ता रहेका छन् ।

यसका साथै, कयौँ गाउँबाट हजारौँ मानिसहरुलाई सुरक्षित स्थानमा सारिएको छ । उत्तराखण्डमा नदीहरुमा पानीको बहावले खतराको संकेत पार गरेको छ भने केही पुलसमेत बगाएको छ । झारखण्डमा शनिबार बिहान माटोको पर्खाल भत्किएर एक महिलाको मृत्यु भएको छ । ओडिशामा भारी वर्षाका कारण बाढी आउँदा ५ सय गाउँका करिब ४ लाख मानिस प्रभावित भएका छन् ।

प्रकाशित समय : १२:३६ बजे