विश्वभर कोरोना भाइरस संक्रमितको संख्या ७५ लाख नाघेको छ । गएको २४ घण्टामा मात्रै एक लाख ४१ हजार ९५० नयाँ संक्रमित थपिएपछि कुल संक्रमितको संख्या ७५ लाख ८९ हजार १०१ पुगेको हो ।

विश्व स्वास्थ्य संगठनका अनुसार अहिलेसम्म कोरोना भाइरस संक्रमणबाट ज्यान गुमाउनेको संख्या चार लाख २३ हजार ६९२ पुगेको छ । एकै दिनमा साढे पाँच हजारभन्दा बढी व्यक्तिको ज्यान गएको स्वास्थ्य संगठनले जनाएको छ ।

कुल संक्रमितमध्ये ३८ लाख ३९ हजार ३९९ जनाको सफल उपचार भएको छ भने ३३ लाखभन्दा बढीको उपचार भइरहेको छ त्यस्तै ५३ हजारभन्दा बढीको स्वास्थ्य अवस्था गम्भीर देखिएको छ । सबैभन्दा बढी प्रकोप फैलिएको अमेरिकामा २० लाख ८९ हजार व्यक्तिमा कोरोना संक्रमण देखिएको छ भने एक लाख १६ हजारभन्दा बढीको ज्यान गएको छ । त्यस्तै ८ लाखको सफल उपचार भएको छ भने ११ लाख ५७ हजारको उपचार भइरहेको छ ।

ब्राजिलमा कोरोना संक्रमितको संख्या आठ लाख नाघेको छ भने ४१ हजारले ज्यान गुमाएका छन् । वर्ल्डोमिटरको तथ्यांकअनुसार अहिलेसम्म ब्राजिलमा तीन लाख ९६ हजारको सफल उपचार भएको छ भने तीन लाख ६७ हजारको उपचार भइरहेको छ । रसियामा पनि कोरोना भाइरस संक्रमितको संख्या पाँच लाख नाघेको छ भने ६ हजारभन्दा बढीको ज्यान गएको छ । त्यस्तै दुई लाख ६१ हजार १५० जनाको सफल उपचार भएको छ भने दुई लाख ३४ हजारको उपचार भइरहेको छ ।

प्रकाशित समय : १४:२४ बजे