घरेलु समिति रसुवाले गाउँ समाजमा छरिएर रहेका उद्यमीलाई प्रोत्साहनस्वरुप प्रविधि हस्तान्तरण गरेको छ ।

सिपको सदुपयोग गर्दै आयआर्जनमा लगनशील भएका तर आर्थिक अभावका कारण काम गर्ने सामग्री नभएका उद्यमीलाई प्रविधि व्यवस्थापनअन्तर्गत सामग्री उपलब्ध गराई नियमित रोजगारीमा लगनशील गराउन प्रोत्साहन गरेको हो ।

सार्वजनिक सूचनामार्फत खुलारूपमा संकलन गरिएको माग फारमलाई सम्बोधन गर्दै उपलब्ध गराइएका सामग्रीले रोजगारीमा दिगोपन हुने अपेक्षा घरेलु समितिले गरेको छ ।

सामग्री गत वर्षको कार्यक्रमअनुसार उपलब्ध गराइएको हो । प्रविधि हस्तान्तरण कार्यअन्तर्गत ८० प्रतिशत सरकारी अनुदान एवं किसानको तर्फबाट २० प्रतिशत रकम जम्मा गरी दर्ता भएका विभिन्न ५६ उद्यमी र फर्मलाई सामग्री खरिदको व्यवस्था गरिएको हो ।

प्रविधि हस्तान्तरण कार्य नीतिअनुरूप उद्योगको कार्य क्षमताको आधारमा प्रति उद्योग ३० देखि  ४० हजारसम्म उपलब्ध गराइएको घरेलु तथा साना उद्योग कार्यालयका प्रमुख आशिष दाहालले जानकारी दिए ।