जनता समाजवादी पार्टी (जसपा)का समानुपातिक सांसदमा लिलादेवी सिटौला चुनिएकी छन् । निर्वाचन आयोगले जसपाको सिफारिसमा खसआर्य समूहको रिक्त भएको सरिता गिरीको स्थानमा सोही समूहको समानुपातिक उम्मेदवारको बन्दसूचीको २ नम्बरमा नाम रहेकी सिटौलालाई निर्वाचित घोषणा गरेको हो ।

गिरीले देशको भूअखण्डतासँग सम्बन्धित निशान छाप परिवर्तनका लागि भएको संविधान संशोधनसम्बन्धी प्रस्तावमा मतदान गर्ने पार्टीको ह्वीप उल्लंघन गरेका कारण पार्टीले कारबाही गरेको थियो ।

अब छिट्टै प्रतिनिधिसभाको सभामुखद्वारा नवनिर्वाचित सांसद सिटौलालाई सपथ ग्रहणका लागि समय मिलाउने जानकारी प्राप्त भएको छ ।

यसअघि आफूलाई पार्टीले विधानविपरीत सांसदबाट हटाउन निर्णय गरेकाले पदमा रहिरहन पाउनु पर्ने गिरीको माग सर्वोच्चले खारेज गरिदिएको थियो । पार्टी र संसद सचिवालयको निर्णयविरुद्ध अन्तरिम आदेशमार्फत रोक लगाउन माग गर्दै उनले सर्वोच्चमा निवेदन दायर गरेकी थिइन् ।

प्रकाशित समय : २२:०२ बजे