काठमाडौंको कमलादीमा मंगलबार बिहान सुनकाे जलप लगाइएकाे साढे १४ किलो चाँदी र आधा केजी सुन फ्याँकेर भाग्ने गाडीलाई पक्राउ गर्न नसकेको विषयमा छानबिन गर्न प्रहरीले समिति गठन गरेको छ । महानगरीय अपराध अनुसन्धान महाशाखाका प्रमुख एसएसपी दिपक थापाको नेतृत्वमा समिति गठन भएको हो ।

समितिमा एसएसपी किरण बज्राचार्य, एसपी सोमेन्द्रसिंह राठौर, डीएसपी दुर्गा दाहाल र राजकुमार केसी छन् । समितिले सुन प्रकरणमा प्रहरी अधिकृतहरुबाट भएको कमजोरीको विषयमा छानबिन गर्ने छ ।

प्रहरी अधिकारीमाथि प्रश्न उठेपछि छानबिन समिति गठन गरिएको महानगरीय प्रहरी कार्यालय, रानीपोखरीका प्रमुख डीआईजी विश्वराज पोखरेलले बताए । उनका अनुसार समितिले गाडी भाग्न सफल हुनुको कारण प्रहरीको कमजोरी मात्र हो कि कुनै नियत पनि थियो ? भन्ने विषयमा छानबिन गर्नेछ ।

चेकजाँचको क्रममा नरोकिएपछि पछ्याउँदा बा. ६ च ५५१९ नम्बरको सो स्कार्पियो गाडी कपडाको सेतो झोला फ्याँकेर भागेको प्रहरीको भनाइ छ । झोलाभित्रबाट प्रहरीले १ केजी लेखिएको ८, २५० ग्राम लेखिएको २६ र ५०० ग्राम लेखिएको एक थान पहेंलाे धातु तथा दुई थान पेस्तोल र म्यागजिन पनि बरामद गरेको छ ।

प्रकाशित समय : २०:२४ बजे