देशभर रहेका कोरोना संक्रमणका गम्भीर बिरामीमध्ये सबैभन्दा बढी बागमती प्रदेशमा रहेका छन् । स्वास्थ्य तथा जनसंख्या मन्त्रालयका अनुसार हाल बागमतीमा १४१ जना बिरामीको आइसीयूमा उपचार भइरहेको छ । त्यस्तै २ जना भेन्टिलेटरमा उपचाररत छन् ।

दोस्रोमा प्रदेश नं. ५ मा ४१ जना कोरोना संक्रमितलाई आइसीयूमा राखेर उपचार भइरहेको छ । त्यसैगरी प्रदेश नं. २ मा १६, कर्णालीमा १५, प्रदेश नं. १ मा १३ र गण्डकीमा ६ जनालाई आइसीयूमा राखिएका छन् । देशभर २३२ जना संक्रमितको आइसीयूमा उपचार भइरहेका मन्त्रालयका प्रवक्ता डा. जागेश्वर गौतमले जानकारी दिए ।

त्यस्तै बागमती प्रदेशमा २६ र प्रदेश नं. १ मा २ जनाको भेन्टिलेटरमा उपचार भइरहेको मन्त्रालयले जनाएको छ । मन्त्रालयका अनुसार गम्भीर स्वास्थ्य अवस्था भएका बिरामीलाई आइसीयू र भेन्टिलेटरमा राखेर उपचार गरिएको हो ।

आज देशभर एक हजार ४ सय ९७ जना कोरोना संक्रमित थपिएका छन् । सबैभन्दा बढी काठमाडौँमा ६०९ जनामा संक्रमण पुष्टि भएको छ । योसँगै देशभर संक्रमितको संख्या ६९ हजार ३०१ पुगेको छ ।

आज थप ४५७ जना डिस्चार्ज भएका छन् । हालसम्म डिस्चार्ज हुनेको संख्या ५० हजार ४११ रहेको छ । थप १७ जनाको मृत्यु भएसँगै नेपालमा कोरोनाबाट ज्यान गुमाउनेको संख्या ४५३ पुगेको छ ।

प्रकाशित समय : २३:५७ बजे