नबिल बैंकले सामाजिक उद्यमशीलतालाई प्रवर्द्धन गर्न सुरु गरेको ‘नबिल सामाजिक उद्यमशीलता’ कार्यक्रम (नबिल एसएसई)को पहिलो ब्याचका २० जना फेलोहरुले ‘इनेबलर्स अफ सोसल आन्ट्रप्रेनरशिप अवार्ड पाएका छन् । नेपाल उद्योग परिसंघअन्तर्गतको सीएनआइवाइईएफ नेपालले यो अवार्ड प्रदान गरेको हो ।

गत शनिबार सीएनआइवाइईएफ नेपालले काठमाडौंमा आयोजना गरेको सीएनआइवाइईएफ नेपाल स्टार्टअप फेस्ट २०२२ मा साे अवार्ड प्रदान गरिएकाे हाे । २०७८ चैत ७ गतेदेखि सुरु गरिएको पहिलो ब्याचको फेलोशिप कार्यक्रमअन्तर्गत देशभरका ३ सय ५० जना आवेदकबाट उत्कृष्ट २० जनालाई सामाजिक उद्यमका लागि त्रिभुवन विश्वविद्यालय आबद्ध व्यवस्थापन संकायसँग सहकार्य गर्दै निःशुल्क तालिम कक्षा सञ्चालन गरिरहेको छ ।

फेलोशिप कार्यक्रमका सहभागीहरुले कृषि, सूचना प्रविधि, हस्तकला, खाद्यान्न, कपडा उत्पादन, कफी शप सञ्चालन लगायतका क्षेत्रमा सामाजिक उद्यम अघि बढाएका छन् । हरेक महिना तीन दिन आवासीय सिकाइ  र बाँकी दिन आफ्नै कार्यस्थलमा प्रयोगात्मक अभ्यास गर्ने ढाँचामा तयार गरिएको फेलोशिप तालिम ६ महिनासम्म चल्छ । बाँकी ६ महिनाका लागि सबै सहभागीलाई मेन्टर सेवा दिएर व्यवसाय गर्दा आइपर्ने व्यवहारिक कठिनाइको समाधानका लागि सहयोग गरिन्छ । सामाजिक उद्यम विकासका लागि सुरु गरिएको यो नयाँ कार्यलाई प्रोत्साहन गर्न उक्त अवार्ड प्रदान गरिएको आयोजकको भनाइ छ ।

यस कार्यक्रममा नेपालमा उद्यमशीलता विकासमा स्थापित उद्यमी तथा अन्य व्यक्तित्वहरुबाट विभिन्न विषयमा प्रेरणादायी वक्तव्यहरु प्रस्तुत गरिएको थियो । उक्त कार्यक्रममा ७ वटा नेपाली स्टार्टअपले व्यवसाय विस्तारका लागि २४ करोड ५० लाख रुपैयाँ लगानी प्राप्त गरेका छन् ।

प्रकाशित समय : १९:०० बजे