गृह मन्त्रालयले गए राति नेपाल प्रहरीका १७ जना एसएसपीलाई डीआईजीमा बढुवा गर्न सिफारिस गरेको छ । बढुवा समितिको बैठकले उनीहरूलाई सिफारिस गरेको हो । जसमध्ये चार जना महिला एसएसपी डीआईजी बढुवाको सिफारिसमा परेका छन् ।

नेपाल प्रहरीको इतिहासमा पहिलो चोटी एकैपटक चार महिला डीआईजीको बढुवामा परेका हुन् । अब उनीहरु सम्भवतः एकैपटक डीआईजी बन्नेछन् । जसमा किरण बज्राचार्य, मीरा चौधरी, दुर्गा सिंह र किरण राणा सिफारिस भएका हुन् ।

बढुवामा बज्राचार्य छैठौं नम्बरमा ,चौधरी नवौं, सिंह १६औं र १७ नम्बरमा राणा सिफारिस भएकी छिन् । उनीहरु २०५१ सालमा एकसाथ इन्स्पेक्टरमा भर्ना भएका हुन् । हालका आईजीपी धिरजप्रताप सिंहपछी यही ब्याचबाट प्रहरी महानिरीक्षक बन्नेछ ।

नेपाल प्रहरीमा अहिले पूजा सिंह एआईजी छन् । यसअघि पार्वती थापा र बिमला थापा नेपाल प्रहरीको डीआईजी बन्न सफल भएका थिए । प्रहरीमा हालसम्म महिला आईजीपी नियुक्त भएका छैनन् । उनीहरु मध्येबाट कुनै एक आईजीपी बन्न सफल भए प्रहरीमा फेरि अर्काे इतिहास बन्नेछ ।

प्रकाशित समय : १७:२९ बजे