लुम्बिनी प्रदेशकी स्वास्थ्य राज्यमन्त्री विमला वली खत्रीलाई प्रहरीले बुटवल पठाएको छ । दाङको तुलसीपुरमा मंगलबार प्रेमी एकराज बस्नेतको घरमा घुसेर उनकी श्रीमती र छोरीमाथि कुटपिट गरेकी वलीलाई प्रहरीले नियन्त्रणमा लिएको थियो ।

झण्डावाल गाडी र सुरक्षागार्डसहित त्यहाँ पुगेकी उनलाई प्रहरीले नियन्त्रणमा लिएकाे थियाे । तर संसद चलिरहेको अवस्थामा बहालवाला मन्त्रीलाई नियन्त्रणमा लिने वा थुनामा राख्न नसकिने भन्दै प्रहरीले बुटवल पठाएको हो । उनलाई मुख्यमन्त्री निवासमा राखिएकाे छ ।

प्रदेश सरकारको आग्रहमा मन्त्री वलीलाई लुम्बिनी प्रदेशको अस्थायी मुकाम बुटवल पठाइएको जिल्ला प्रहरी कार्यालय दाङका प्रमुख सुरेश काफ्लेले बताए । ‘उहाँलाई हामीले कानुन सम्मत र प्रक्रिया पुर्‍याएर छोडेका छौं ।’ काफ्लेले भने ।

पीडित महिला मिना भण्डारीले भने आफूमाथि राज्यमन्त्री वलीले अभद्र व्यवहार गरेको भन्दै प्रहरीमा जाहेरी दिएकी छन् । तर प्रहरीले उनको जाहेरी लिएको छैन । राज्यमन्त्रीको ब्यवहारबाट आक्रोशित स्थानीय इप्रका तुल्सीपुरमै पुगेर राज्यमन्त्रीविरूद्ध नाराबाजी गर्दै कारबाहीको माग गरे थिए ।

घोराहीबाट जिल्ला प्रहरी प्रमुख एसपी सुरेश काफ्ले आफैं खबर सार्वजनिक हुनासाथ तुलसीपुर पुगिसकेका थिए । तनावपूर्ण वातावरण मत्थर पार्ने प्रयास सफल नहुने देखेपछि मध्यान्ह १२ बजेतिर प्रहरीले कडा सुरक्षा बिच राज्यमन्त्री वलीलाई घोराही लगेको थियो ।

प्रहरी अधिकारीका अनुसार राज्यमन्त्री वलीले आफ्नो फोटो सामाजिक सञ्जालमा सार्वजनिक गरिएको तथा आफ्नो पैंसासमेत नदिएकोले आवेगमा आएर बस्नेतको घर पुगेको प्रहरीसमक्ष बताएकी छन् ।

अब उनलाई कारबाही गर्नका लागि प्रशासन र सभामुखबाट पत्राचार वा समन्वयमा मात्रै उजुरी दर्ता लगाएतका प्रक्रिया अगाडि बढ्ने प्रहरीको भनाइ छ । राज्यमन्त्रीको हर्कत सार्वजनिक भएपछि त्यसको चौतर्फी आलोचना भइरहेको छ। नेकपा एमालेले उनलाई राज्यमन्त्रीबाट बर्खास्त गर्न माग गरिसकेको छ ।

प्रकाशित समय : १५:३९ बजे