नेकपा एमालेले पोखरा महानगरपालिकाको उपमेयरमा उम्मेद्वार बनाएकी मञ्जुदेवी गुरुङले टिकट अस्वीकार गरेकी छन् । हाल पनि पोखरा महानगरको उपमेयर रहेकी गुरुङले पुनः सोही पदमा दोहोरिन अस्वीकार गरेकी हुन् ।

आफूले मेयर वा उपमेयर कुनै पनि पदमा आकांक्षा नदेखाएको गुरुङको भनाइ छ । उम्मेदवार हुन आकांक्षा नदेखाएको र नाम समेत नटिपाएको अवस्थामा आफूलाई पार्टीले उपमेयरको उम्मेदवार बनाउने निर्णय गरेको गुरुङले बताएकी छन् ।

सार्वजनिक रुपमा व्यक्त नगरे पनि गुरुङले मेयरमा नै आकांक्षा देखाएको उनीनिकट नेताहरु बताउँछन् । पार्टीले आफ्नो कामको मूल्यांकन गरेर जिम्मेवारी दिनुपर्ने, तर त्यसो नभएको भन्दै गुरुङले असन्तुष्टि जनाएकी हुन् ।

पोखरा महानगरमा एमालेले दीपक पौडेललाई मेयरको उम्मेद्वार बनाएको छ । सत्ता गठबन्धनका तर्फबाट नेकपा एकीकृत समाजवादीले धनराज आचार्यलाई टिकट दिएको छ ।

प्रकाशित समय : १७:०९ बजे