शुक्रबार मध्यरातसम्म नेपाली कांग्रेसका शीर्ष नेताहरु उम्मेद्वारको टुंगो लगाउन घनिभूत छलफल चलाए । प्रधानमन्त्रीको सरकारी निवास बालुवाटारमा बसेको बैठक कुनै पनि उम्मेदवारको टुंगो नलगाइ सकियो । नेताहरूले आ-आफ्नो पक्षका उम्मेद्वारको सिफारिसलाई प्राथमिकता दिएपछि सहमति जुट्न नसकेको हो । तर पनि काठमाडौंको मेयरमा सिर्जना सिंहको नाम टुंगिएको बैठकमा सहभागी एक नेताले बताए ।

विराटनगर महानगरको मेयरका लागि नागेश कोइराला, भीम पराजुली, डीला संग्रौला र अमृत अर्यालको विषयमा बढी छलफल भएको थियो ।

कोइरालाको पक्षमा नेता डा. शेखर कोइराला उभिएका थिए । अर्का नेता कृष्ण सिटौलाले वर्तमान मेयर भीम पराजुली नै दोहोर्‍याउनु पर्ने अडान लिएको बैठकमा सहभागी एक नेताले बताए । देउवा पक्ष भने डिला संग्रौला र अमृत अर्यालका विषयमा विभाजित बनेको थियो ।

शनिबार पुनः केन्द्रीय कार्यसम्पादन समितिको बैठक बसेर सहमति खोज्ने प्रयास गरिएको छ । शुक्रबारका लागि तय गरिएको बैठक एक दिनपछि आज बस्न लागेको हो । बैठक आज बिहान ११ बजे बस्ने नेपाली कांग्रेसका मुख्य सचिव कृष्णप्रसाद पौडेलले जानकारी दिए । शुक्रबार पदाधिकारीको बैठक लम्बिएपछि कार्यसम्पादन समितिको बैठक स्थगित भएको थियो ।

आजको बैठकमा महानगर र उपमहानगरपालिकाको मेयर र उपमेयरको उम्मेदवारबारे छलफल हुनेछ ।