स्मार्ट च्वाइस टेक्नोलोजीज ९एससीटी०ले नयाँ लोगो सार्वजनिक गरेको छ । साथै, यसले आफ्ना सेवामा सुधारको घोषणा गरेको छ । नेपालबाट सञ्चालित एससिटी कम्पनीले ’क’ वर्गका वाणिज्य बैंक, विकास बैंक तथा वित्तीय संस्थालाई विभिन्न प्रकारका कार्ड र भुक्तानी प्लेटफर्म उपलब्ध गराउँदै आएको छ ।

एससीटी नेपाललाई पहिलो पटक विल्कुलै नयाँ इन्टग्रेटेड सेयर्ड स्विचिङ पेमेन्ट नेटवर्क र डोमेस्टिक प्रोपाइटरी कार्ड योजनासँग परिचित गराउने पथ प्रदर्शक हो । बिहीबार एससीटीले आफ्ना आयामलाई अझ विस्तृत गर्दै विविध किसिमका सेवालाई एउटै छातामुनि एकीकृत गरेको छ । यसले दोहोरो इन्टरफेस (सम्पर्कसहित र सम्पर्कविहीन)देखि लिएर डेबिट र प्रिपेड कार्ड (घरेलु र अन्तर्राष्ट्रिय), एटीएम र पीओएसको परस्पर सम्बन्ध, बीएफआइबीचको अन्तर सञ्चालन, अन्तर्राष्ट्रिय योजनाको गेटवे, क्यूआरसी भुक्तानी प्लेटफर्म र यसमार्फत वित्तीय प्रविधिको पूर्ण समाधान सम्मका विविधतापूर्ण भुक्तानी सेवा प्रवाह गर्दै नेपालमा डिजिटल भुक्तानीको पूर्वाधार र विकासमा टेवा पुर्‍याएको छ।

'पोर्टफोलियोमा नयाँ सेवा थप गर्न पाउँदा उत्साहित छौँ । नेपाललाई डिजिटल भुक्तानीमा विश्वभर उत्कृष्ट प्रविधिमा आधारित बन्न मद्दत पुर्‍याउनने कम्पनीको भिजनलाई नयाँ लोगोले संकेत गर्छ,' कम्पनीका प्रमुख कार्यकारी अधिकृत नारायण प्रकाश भुजुले बताए ।

सन् २००१ मा स्थापित, एससिटी र एसिटी नेटवर्कको रुपमा चिनिने स्मार्ट च्वाइस टेक्नोलोजी लिमिटेड, नेपाल राष्ट्रिय बैंकअन्तर्गत लाइसेन्स प्राप्त भुक्तानी सेवा अपरेटर (पीएसओ) हो । एससीटीले नेपालका अधिकांश वाणिज्य बैंक, विकास बैंक, पीएसपी पेमेन्ट सर्भिस प्रोभाइडर र अन्य वित्तीय संस्थालाई विभिन्न कार्ड र भुक्तानी प्लेटफर्म उपलब्ध गराउँदैछ।

एससीटीले आफ्ना सेवा र पहुँच विस्तार गर्न अन्तर्राष्ट्रिय भुक्तानी प्रोसेसर र योजना (युनियन पे इन्टरनेसनल, पल्स नेटवर्क र एफएसएस आदि) सँग रणनीतिक गठबन्धनमा पनि प्रवेश गरेको छ ।

प्रकाशित समय : १८:२३ बजे