चुनावी तालमेलको ताल मिलाउन झण्डाझण्डै विभाजनको डिलमा पुगेको सत्ता गठबन्धन बुधबारबाट एउटा सहमतिमा आएको छ । त्यो सहमतिअनुसार महानगर र उपमहानगरको भागबण्डा मिलेपछि दलहरुले अब सिंगै चुनावमा जाने विश्वास त बनाएका छन्, तर गठबन्धनभित्रै एकअर्कामा रहेको अविश्वासले ढुकचुक कायमै छ ।

यसका बाबजुद पनि अब पाँच दल पाँच दिनमा सात प्रदेशलाई सम्बोधन गर्ने तयारी छन् । सत्ता गठबन्धनको साझा सहमतिमा कार्यतालिका नै बनाएर बैशाख १८ मा धनगढीबाट सुरु भइ बैशाख २२ मा काठमाडौंमा सक्नेगरि ठुला आम सभा आयोजना गरिएको छ ।

जसलाई प्रधानमन्त्री शेरबहादुर देउवासहित पाँच दलका शिर्ष नेता र पाँच दलीय संयन्त्रका संयोजक रामचन्द्र पौडेलले सम्बोधन गर्नेछन् । मुलतः उसैगरि तयारीमा रहेको नेकपा एमाले र सत्ता गठबन्धनको चुनावी ब्याटलको तीब्र दौड अब सुरु भएको छ । गठबन्धनले बुधबार भागबण्डाको विषयलाई टुङग्याएको थियो ।

त्यसको एकदिनपछि महानगर र उपमहानगरबारे निर्णायक छलफल गरेको एमालेले बैशाख १० मा मात्रै उम्मेद्वारको टुंगो लगाउने भएको छ । यसको मतलब गठबन्धनले उठाएका उम्मेद्वारको अनुहार हेरेर मात्रै आफ्ना उम्मेद्वारको टुंगो लगाउने एमालेको नीति छ । ‘त्यो पनि एउटा पक्ष हो । हामीले परिस्थितिको राम्रोसँग आकलन गरेका छौं’, नेकपा एमालेका नेता तथा प्रचार विभाग उपप्रमुख विष्णु रिजालले भने, ‘हाम्राविरुद्ध गठबन्धन कसरी अगाडी बढ्छ, त्यसकाविरुद्ध कदम चाल्न हामी सचेत छौं । उम्मेद्वार छनोटका विषयमा हामी प्रक्रियागत ढंगबाट अघि आएका छौं । गाउँ, जिल्ला हुँदै प्रदेशमार्फत हाम्रो उम्मेद्वारहरु सिफारिस भएका छन् ।’

बैशाख ११ र १२ मा दलहरुले उम्मेद्वार मनोनयन गरिसक्नुपर्नेछ । तर सत्ता गठबन्धन न एमाले, कसैले उम्मेद्वारको टुंगो लगाएका छैनन् । गठबन्धनले यसअघि जारी गरेको मापदण्ड, सहमतिको मर्म र भावनाअनुरुप सम्बन्धित समितिहरुको बैठक बसी अविलम्ब सिट बाँडफाँट तथा उम्मेदवारहरुको चयन गर्न निर्देश गरेको छ । तर गठबन्धनको नेतृत्वकर्ता नेपाली कांग्रेसभित्रबाटै तालमेल कार्यान्वयनमा चुनौती थप्ने गरि अभिव्यक्ति आइरहेका छन् ।

संस्थापनइतरको नेतृत्व गरेको शेखर कोइराला समूहले गठबन्धनबीच चुनावी तालमेलको आवश्यकता नभएको भन्दै निरन्तर प्रश्न उठाउनुलाई गम्भीर रुपमा हेरिएको छ ।

गठबन्धनमै आवद्ध अन्य दललाई नेपाली कांग्रेसबाट मत आउने सम्भावनामाथि समेत शंका गरिएको छ । ‘उहाँहरुले अरुलाई मत हाल्न चाहनुहँदैन भने हामी पनि सोच्न बाध्य हुनेछौं’, नेकपा एकीकृत समाजवादीका पोलिटब्यूरो सदस्य प्रेमलकुमार खनालले भने, उहाँहरुले त्यसरी गठबन्धनविरोधी अभिव्यक्ति दिन मिल्दैन । हामी एकढीक्का भएर चुनावमा जान्छौं र जितेर आउँछौं ।’

गठबन्धनले महानगर र उपमहानगर भागबण्डाको विषयलाई टुंग्याएको छ । ५० प्रतिशत कांग्रेसलाई दिएर बाँकी एक/एक सिटमा अन्य दलले चित्त बुझाएका छन् । उपमहानगरको हकमा ६० प्रतिशतभन्दा धेरै स्थानमा कांग्रेसले भाग पाएको छ ।

पहिलो पार्टी बन्नका लागि भाग पाएका स्थानमध्ये ९० प्रतिशतमा जित हासिल गर्नुपर्छ । यसको मतलब कांग्रेसलाई १० प्रतिशतमात्रै हार्ने छुट छ । चितवनको भरतपुरमा माओवादीले भाग पाएको छ । छोरी रेनु दाहाललाई सुरक्षित बनाउन पाएपछि माओवादी अध्यक्ष पुष्पकमल दाहाल ‘प्रचण्ड’ले एकीकृत समाजवादी र जसपाकै हैसियतमा आफुलाई खुम्च्याएका छन् ।

माओवादीले न अरु स्थानमा भाग खोज्यो, न माओवादीबाट अरु कसैले उम्मेद्वारीका लागि दाबी प्रस्तुत गरे ।

पोखरामा भाग पाएको नेकपा एकीकृत समाजवादीलाई बलियो प्रतिस्पर्धी एमालेसँग जित्न कठिन छ । गत निर्वाचनमा कांग्रेस र माओवादीबीच तालमेल हुँदा पनि करिब १३ हजार बढी मतान्तरले एमाले विजयी भएको थियो । सोचेअनुसारको मत परिणाम नआए पार्टी निर्माणको चरणमा रहेको एकीकृत समाजवादीको हालत के हुन्छ अहिलेदेखि चिन्ता गर्न थालिएको छ । महानगर र उपमहानगरमा भागबण्डा मिलाएपछि तल्लो तहमा समेत चुनावी तालमेलको दबाब केन्द्रबाटै दिइएको छ ।

एमालेले गठबन्धनका नीतिहरुलाई हेर्ने र सम्भावित जोखिमलाई आँकलन गर्दै उम्मेद्वार छनोट गर्ने तयारी गरेको छ ।

प्रकाशित समय : १७:३१ बजे