महालक्ष्मी विकास बैंक लिमिटेडको डडेल्धुरा शाखाले संस्थागत सामाजिक उत्तरदायित्व कार्यक्रमअन्तर्गत अजयमेरु गाउँपालिकास्थित सहश्रलिंग उच्च मावि विचमडालाई ह्वाइट बोर्ड तथा खानेपानी ट्यांकी हस्तान्तरण गरेको छ ।

विद्यालयको प्रांगणमा आयोजित विशेष कार्यक्रमबीच बैंकले विद्यालयमा अध्ययनरत विद्यार्थीको पठनपाठनमा सहजताका लागि ७ ह्वाइट बोर्ड तथा पिउने पानीको सहजताका निम्ति १००० लिटर क्षमता भएको १ थान पानी ट्यांकी हस्तान्तरण गरेको छ । कार्यक्रममा अजयमेरु गाउँपालिका-२ का वडाध्यक्ष शिवराज भट्ट, विद्यालय व्यवस्थापन समितिका अध्यक्ष हरिकृष्ण पाल, विद्यालयका प्रधानाध्यापक रनबहादुर ऐर, शिक्षक, विद्यार्थी, राजनीतिक दलका प्रतिनिधि, अन्य विभिन्न संघसंस्थाका प्रतिनिधि, स्थानीय, पत्रकार तथा बैंकका कर्मचारीको उपस्थिति थियो ।

कार्यक्रममा बोल्दै विद्यालयका प्रधानाध्यापक ऐरले विगतदेखि नै बैंकले सामाजिक तथा आर्थिक रूपान्तरणमा विभिन्न कार्यक्रम गरी उदाहरणीय कार्य गर्दै आएकोमा महालक्ष्मी विकास बैंकलाई धन्यवाद ज्ञापन गरे । आगामी दिनमा पनि सामाजिक, आर्थिक रूपान्तरणका विभिन्न कार्यक्रम निरन्तर रूपमा सञ्चालन गर्ने डडेल्धुरा शाखाका प्रबन्धक प्रकाश खड्काले जानकारी गराए ।

बैंकले १ नम्बर प्रदेशमा ५, मधेश प्रदेशमा १५, बागमती प्रदेशमा ३७, गण्डकी प्रदेशमा ९, लुम्बिनी प्रदेशमा १८, कर्णाली प्रदेशमा २ र सुदूरपश्चिम प्रदेशमा १७ गरी कूल १०३ वटा शाखामार्फत करीब ६ लाख ग्राहकलाई वित्तीय सेवा सरलीकृत तवरले प्रदान गर्दै आइरहेको जनाइएको छ ।

प्रकाशित समय : १६:२५ बजे