आस्थाको महापर्व चैते छठको तेस्रो दिन आज अस्ताउँदो सूर्यलाई अर्घ्य दिइएको छ । चार दिवसीय चैते छठ पर्वको आज तेस्रो दिन अस्ताउँदै गरेको सूर्यलाई ठेकुवा, भुसवा, केरा, अदुवा, नरिवल, फलफूलसहित विभिन्न परिकारको अर्घ्य अर्पण गरी चैते छठ पर्व मनाइँदैछ ।

शरद र वसन्त ऋतुमा गरी वर्षमा दुईपटक मनाइने छठ सूर्य उपासनाको पर्व हो । शरद ऋतुमा कात्तिक शुक्ल चौथीदेखि सप्तमीसम्म र वसन्त ऋतुमा चैत शुक्ल चौथीदेखि सप्तमीसम्म समान विधिले यो पर्व सम्पन्न गरिन्छ । सर्लाही सदरमुकाम मलंगवालगायत ग्रामीण क्षेत्रमा समेत चैते छठ मनाउनेको संख्या बढ्दै गएको छ । कात्तिक महिनामा मनाइने छठभन्दा चैते छठ मनाउनेको संख्या कम भए पनि विगतकोभन्दा यस वर्ष छठ मनाउनेको संख्या बढ्दै गएको हो ।

मधेस प्रदेशको प्राचीन मिथिला क्षेत्रमा छठ जन-जन परिचालन हुने महापर्व मानिन्छ । यद्यपि शारदीय छठ जति यो पर्व मनाउने भने देखिँदैनन् । पर्वको पहिलो दिन ‘नहाय-खाय’, दोस्रो दिन दिनभरि उपवास बसेर राति सख्खरमा पकाइएको खिरमात्र खाएर ‘खरना’, तेस्रो दिन अर्थात् षष्टि तिथिमा निराहार उपवास बसेर साँझ अस्ताउँदो सूर्यलाई पवित्र जलाशयको घाटमा कम्मरसम्म पानीमा चोबलिएर अर्घ्य दिइन्छ ।

अन्तिम दिन सप्तमीका दिन बिहान उदाउँदो सूर्यलाई घाटमै अर्घ्य दिएर पर्व सम्पन्न गरिन्छ । छठ पर्व मान्नाले दुःखबाट मुक्ति, सन्तान प्राप्ति, चर्मरोग निकोे हुने र पारिवारिक सुख शान्ति हुने जनविश्वास छ ।

प्रकाशित समय : ०३:१३ बजे