उदयपुरमा १५ वर्षीया एक छात्राको शव फेला परेको छ । बेलका नगरपालिका-३ स्थित एक विद्यालयमा कक्षा १० मा अध्ययनरत छात्रा कविता सुनुवारको हत्या गरिएको अवस्थामा शव फेला परेको प्रहरीले जनाएको छ ।

कविताको शव हत्या गरेर यसोदा खोलामा फालिएको अवस्थामा फेला परेको हो । घरबाट ट्युशन पढ्न निस्किएकी कविताको बाटोमै विभत्स तरिकाले हत्या गरेपछि खोलामा फालेको अवस्थामा फेला परेको प्रहरीले जनाएकाे छ । उदयपुरका प्रहरी प्रमुख सुवासचन्द्र बोहराका अनुसार शव मंगलबार बिहान ७ बजे खोला किनारामा स्थानीयले देखेपछि प्रहरीलाई खबर गरेका थिए । घटनाबारे अनुसन्धानका लागि केन्द्र र प्रदेश प्रहरीको टोलीसमेत खटिएको छ ।

उनी कोशी जनता माध्यमिक विद्यालय रामपुरमा अध्ययनरत थिइन् । एसईई परीक्षा नजिकिँदै गर्दा उनी ट्युशन पढ्न सधैँ बिहानै जाने गरेकी थिइन् । घटनास्थलबाट करिब सात सय मिटर पर विद्यालय छ भने उनको घर करिब दुई किलोमिटरको दूरीमा छ ।

घटनामा संलग्न रहेकाे आशंका दुई जनालाई नियन्त्रणमा लिएकाे प्रहरीले जनाएकाे छ ।

प्रकाशित समय : २०:३२ बजे