दोस्रो एकदिवसीय अन्तर्राष्ट्रिय क्रिकेटमा दिपेन्द्रसिंह ऐरीको शतकप्रेरित नेपालले पपुवा न्युगिनी (पीएनजी)विरुद्धको दोस्रो एकदिवसीय खेलमा २७९ रनको लक्ष्य प्रस्तुत गरेको छ । टस जितेर ब्याटिङ राेजेकाे नेपालले निर्धारित ५० ओभरमा आठ विकेट गुमाएर २७८ रनको योगफल तयार गरेकाे हाे ।

नेपालका लागि तेस्रो नम्बरमा ब्याटिङका लागि आएका दिपेन्द्रले एक सय ४० बलमा सात चौकासहित एक सय पाँच रन बनाए । उनको यो पहिलो एकदिवसीय शतक हो । स्कोरबोर्डमा पाँच रन जोड्दा दुवै ओपनर गुमाएको नेपालको इनिङ दिपेन्द्र र देव खनालले कीर्तिमानी साझेदारी गर्दै उकासेका थिए । देव र दिपेन्द्रले कीर्तिमानी एक सय २९ रनको साझेदारी गरेका थिए । जुन एकदिवसीय क्रिकेटमा नेपालको सबैभन्दा उच्च साझेदारी हो ।

एकदिवसीय खेलमा पहिलो अर्धशतक बनाएका देवले ८६ बलमा चार चौका र तीन छक्कासहित ७२ रन बनाए । यसबाहेक, नेपाली टोलीको खातामा रोहितकुमार पौडेलले ३५, भीम सार्कीले २६ रन बनाउँदा अन्तिममा आक्रामक ब्याटिङ गरेका कप्तान सन्दीप लामिछानेले नौ बलमा दुई चौका र एक छक्कासहित २४ रनको योगदान गरे ।

नेपाली टोलीका ओपनरद्वय कुशल भुर्तेल गोल्डेन डकआउट हुँदा अनिल साह एक रनमा आउट भएका थिए । यसबाहेक पवन सर्राफ पनि गोल्डेन डकआउट भए ।

प्रकाशित समय : १९:५१ बजे