स्वास्थ्य तथा जनसंख्या राज्यमन्त्री उमेश श्रेष्ठले हरेक दिन कोरोनाविरुद्धको दुई लाख खोप लगाउने घोषणा गरेका छन् । बिहीबार प्रतिनिधि सभा बैठकमा बोल्दै उनले खोप र नागरिकको जीवन रक्षालाई सरकारले उच्च प्राथमिकता दिएको दाबी गरे ।

सरकारले खोप आयात बढाएको उनको भनाइ छ ।  ५ करोड ५० लाख खोप आवश्यक पर्ने भन्दै उनले पूर्ववर्ती सरकारले ४२ लाख खोप उपलब्ध गराएको बताए । बुधबारसम्म ७५ लाख डोज खोप लगाइएको उनले जानकारी दिए । 'सरकारले अभियानको रुपमा दैनिक १ लाख देखि २ लाख खोप लगाउने कार्यक्रमको थालनी गरेको छ । असोज मसान्तसम्म १ करोड ८ लाख खोप प्राप्त हुने सुनिश्चत भएकाे छ,' उनले भने ।

उमेर समूह र आर्थिक गतिविधि हुने ठाउँमा छुट्टै व्यवस्थापन गरेर खोप दिइने उनको भनाइ छ । खाेपका लागि धेरै संक्रमित रहेका १५/१६ जिल्लालाई प्राथमिकतामा राखिने उनले जानकारी दिए । 'आगामी दिनमा सरकारले निजी क्षेत्रसँगको साझेदारीबाट खोप कार्यक्रमलाई अघि बढाउने छ । निजी क्षेत्रका स्वास्थ्य क्षेत्रलाई नाफाभन्दा सेवामुखी बनाउन सरकारले पहल गर्छ,' राज्यमन्त्री श्रेष्ठकाे भनाइ छ ।