राकुटेन भाइबरले नेपालको चर्चित गायक स्वप्न सुमनको साथ आफ्नो पहिलो स्थानीय अडियो स्टिकर प्याक सुरू गर्न सहकार्य गरेको छ । अडियो स्टिकर भाइबरमा विशेष रूपमा उपलब्ध हुने र यो सबै नेपाली प्रयोगकर्ताको लागि निःशुल्क हुने जनाइएको छ ।

प्याकमा उनको एल्बमको सबैभन्दा लोकप्रिय ट्रयाक र उनको आगामी नयाँ एल्बम, 'प्रतिकृति' को नयाँ गीत 'एकभन्दा दुई'को केही अंश सामेल छन् । स्टिकर प्याक डाउनलोड गर्दा प्रयोगकर्ता स्वचालित रुपमा स्वप्न सुमनको भाइबर कम्युनिटीमा सामेल हुनेछन्, जहाँ उनीहरू गायकसँग अझ नजिकिन सक्नेछन् । उनको सांगीतिक यात्रासँग अपडेटेड हुन सक्नेछन् र उनीसँग कुराकानी गर्ने मौका पनि पाउने छन् ।

भाइबरमा आउने उनको अडियो स्टिकर प्याकको बारेमा स्वप्नले भने, 'यो मेरो भाइबरसँग मिलेर काम गरेको दोस्रोपटक हो र म यो अवसर पाएकोमा निकै सम्मानित छु । यो मेरो लागि एक रमाइलो अनुभव हो र यो स्टिकर प्याक सिर्जना गर्दा मलाई धेरै रमाइलो पनि भयो ।' उनले आफ्नो गीतको भाग भएका अडियो स्टिकरले भाइबरमा सबैको कुराकानी र अनुभवलाई रोमाञ्चक बनाउने विश्वास व्यक्त गरे । स्वप्नले २०२० मा भाइबरसँग सहकार्य गरी आफ्नो पहिलो स्टिकर प्याकको सुरूवात गरेका थिए । जसमा उनका गीत र फ्यानडमबाट फोटोहरू र उद्धरणहरू प्रस्तुत गरिएको थियो । अप्रिल २०२० मा रिलिज भएको उनको सबैभन्दा लोकप्रिय गीत 'नबोली तिमी बुझिदेउ'को पनि भाइबर एक हिस्सा थियो । यस वर्षपनि भाइबरसँग मिलेर उनको नयाँ गीत 'एकभन्दा दुई' लाई जुलाई ३०, २०२१ मा रिलिज गर्नसँगै काम गरिरहेका छन् । भाइबरको अडियो स्टिकरहरुको माध्यमबाट स्वप्नको नयाँ गीतको झलक सुन्नको लागि स्वप्न सुमनका प्रशंसकहरुको लागि यो ठूलो अवसर पनि हो ।

'भाइबर स्टिकर प्याक हाम्रो मेसेजिङ एपमा सधै लोकप्रिय फिचर भएको छ र अडियो स्टिकरको सुरूवातले कुराकानीलाई अझ रमाइलो र अर्थपूर्ण बनाउने छ,' राकुटेन भाइबरको एप्याकका वरिष्ठ निर्देशक डेभिडचेले भने, 'हामीलाई गत वर्ष स्वप्नसँग मिलेर काम गर्न निकै रमाइलो लागेको थियो र यस वर्ष पनि उनको नयाँ गीतको सुरूवातको एक हिस्सा हुन पाउँदा हामी धेरै खुसी छौं । यो हाम्रो प्रयोगकर्ताको लागि पनि धेरै रमाइलो हुनेछ ।' अडियो स्टिकर प्याक स्वप्न सुमनको आधिकारिक भाइबर कम्युनिटीसँग जोडिएको छ । जहाँ उनका फ्यानहरुले स्वप्नसँग भिडियो कल गर्न, उनीसँग उनैका गीत गाउन र कुनै गीतको लागि अनुरोध पनि गर्न सक्नेछन् ।

कुराकानीलाई अझ राम्रो ढंगमा अभिव्यक्त गर्न र रमाइलो बनाउनका लागि दुवै एन्ड्रोइड र आइफोनमा ग्राहकले अडियो स्टिकर प्याक डाउनलोड गर्नुपर्ने हुन्छ । स्टिकर प्याक डाउनलोडका लागि जुलाई २९, २०२१ मा उपलब्ध हुने भाइबरले जनाएको छ ।