Nepalese Flag २०७८ असोज ४ गते सोमबार   |   September 20, 2021

गुह्येश्वरमुनिको बागमती किनारमा ४२८औं हप्ताको सफाइ

न्युज कारोबार काठमाडौं साउन ९, २०७८       

गुह्येश्वरमुनिको बागमती किनारमा ४२८औं हप्ताको सफाइ फाइल तस्बिर

बागमती सफाइ महाअभियानको ४२८औं हप्तामा गुह्येश्वरीमुनिको नदी किनारमा सफाइसँगै वृक्षरोपण गरिएको छ । अधिकार सम्पन्न बागमती सभ्यता एकीकृत विकास समितिका सञ्चालक सदस्य डा. माला खरेलको नेतृत्वमा भएको कार्यक्रममा अधिकार सम्पन्न बागमतीका अध्यक्ष उद्धवप्रसाद तिमल्सिनालगायत कर्मचारी, काठमाडौं महानगरपालिका-११ का अध्यक्ष हीरालाल तण्डुकार, अभियानकर्मी दुर्गा रावललगायतको सक्रियता थियो ।

सफाइपछि अधिकार सम्पन्न बागमतीको कार्यालय परिसरमा साउन महिनाको अवसर पारेर ५० रुद्राक्षका बिरुवा पनि रोपिएको छ । यसैगरी अभियानकर्मी डा. लक्ष्मी पौडेलको नेतृत्वमा शंखमूल क्षेत्रको नदी किनारमा पनि सफाइ गरिएको छ ।
विष्णुमती सफाइको ३६१औं हप्तामा टोखा नगरपालिका–९ मनमैँजु पुलबाट दक्षिणतर्फको भागमा नदीको पर्खालसँगैको भागमा लगाइएका बिरुवाको गोडमेल गरिएको छ । सो अवसरमा सडक पेटीमा सफाइसमेत गरिएको संयोजक शोभाकान्त पाण्डेले जानकारी दिए । सफाइमा अभियानकर्मी एवं स्थानीयबासीको उल्लेख्य सहभागिता थियो । 
 
यसैगरी बागमती गुह्येश्वरीमाथिको भाग, रुद्रमती, विष्णुमतीको माथिल्लो भाग, मनोहरा, ललितपुरको गोदावरी खोला, चक्रपथका उत्तर र पश्चिमी भेगमा पनि भौतिक दूरी कायम गरी स्वास्थ्य सुरक्षाका विधि अपनाएर सफाइ गरिएको छ । विसं २०७० जेठ ५ गतेदेखि सुरु भएको बागमती सफाइ महाअभियान प्रत्येक हप्ताको शनिबार जारी छ । (रासस)

सम्बन्धित खबरहरु