राइड सेयरिङ एप साथीले कोरोना भाइरसको शंका भएका व्यक्तिहरुका लागि घरमै पीसीआर परीक्षण गर्न सकिने विशेष सेवा सुरु गरेको छ । विगत लामो समयदेखि राइड सेयरिङ सुविधा दिँदै आएको साथी राइडले यस कोरोना महामारीको विषम परिस्थितिलाई न्यूनीकरण गर्न 'घरमै बसौं, सुरक्षित रहौँ' भन्ने नाराका साथ विभिन्न अस्पताल तथा प्रयोगशाला (ल्याब)सँग सहकार्य गरी कस्टमरलाई सहज तथा सुरक्षाको लागि घरमै पिसीआर स्वाब संकलन गर्न मद्दत गर्दैछ ।

यस अघि कम्पनीले यात्रीलाई राइड बुकिङ, रेन्टल कार सर्भिस र फुड डेलिभरी सर्भिस दिँदै आएको थियो । कम्पनीका बजार व्यवस्थापन प्रमुख इन्जोल श्रेष्ठले भने, 'हाल उपत्यकामा मात्रै यो सेवा सुरु भएता पनि आउँदो दिनमा हामी यस सुविधालाई विस्तार गर्दै नेपालका विभिन्न जिल्लामा पनि यो सेवा उपलब्ध गराउने छौ । हामीले अहिले एम्बुलेन्स नपाएर कोरोना तथा अन्य रोगका कारण मृत्यु भएको खबरहरु धेरै नै सुनिरहेका छौ । यही कुरालाई मध्यनजर गर्दै हामीले विभिन्न संघ संस्थाहरुसँग सहकार्य गरी इमरजेन्सी कार सर्भिस साथै हेलि एम्बुलेन्सको सुविधा पनि सञ्चालन गर्ने तयारीमा छौ ।'

हाल घरमै पिसीआर परीक्षण गराउने यो सेवा काठमाडौंमा सुरु भईसकेको छ भने आगामी दिनमा देशका अन्य सहरमा पनि उपलब्ध गराउने योजना लिईएको छ। यो सेवा लिनका लागि सेवाग्राहीले साथी एप डाउनलोड गरेर त्यसमा आफ्नो नाम ठेगानासहितको जानकारी राखेर रजिस्टर गर्नुपर्ने हुन्छ । सो एपमार्फत सिधै सेवा लिन सकिन्छ । साथी एप अहिले गुगल प्ले स्टोरमा मात्र उपलब्ध छ भने आगामी दिनमा आईओएसमा पनि ल्याउने तयारी गरिएको छ ।

प्रकाशित समय : २१:१२ बजे