काठमाडौं।

सरकारले आगामी जेठ १५ गणतन्त्र दिवसका दिनदेखि ठूलो बसहरु सञ्चालनमा ल्याउने भएको छ । सरकारको ठूलो वस सञ्चालन गर्ने नीतिअनुसार दिगो सार्वजनिक यातायातले जेठ १५ देखि नयाँ बसपार्क–सिनामंगल रुटमा सुविधा सम्पन्न ठुला बस सेवा सञ्चालन गर्ने भएको छ ।

गणतन्त्र दिवसको अवसर पारेर बस सेवा सञ्चाल गर्ने योजनाका साथ काम भैरहेको दिगो सार्वजनिक यातायातका सचिव लालप्रासद गुरागाँईले बताए । उनका अनुसार गत वैशाखबाट बस सेवा शुभारम्म गर्ने योजना बनाएको थियो तर कम्पनीले युरो मापदण्ड ४ को गाडी ल्याउने भएपछि करिव एक महिना ढिला हुन गएको हो ।

‘हामीले हिजो गाडी बनाइरहेको कम्पनीसंग कुरा गरेको थियौं, उनीहरुले भोली छ वटा बस पठाउँछौ भनेका छन्,’ उनले भने, ‘जेठ १५ सम्म कतिवटा गाडी आइपुग्छन् हामी सेवा सुरु गर्छौ ।’ युरो ४ मापदण्डका गाडीहरु सबैभन्दा कम प्रदुषण गर्ने सवारी साधनमा पर्दछन् । कम्पनीले सुरुमा १७ वटा बस ल्याएर सरकारको ‘मास ट्रान्सपोर्टेसन’ योजना कार्यान्वयन गर्न लागेको हो ।

‘मास ट्रान्सपोर्टेसन’ व्यवस्था कार्यान्वयनका लागि पाइलट प्रोजेक्टका रुपमा यो रुटमा जेठदेखि ठूला बस मात्रै सञ्चालन गर्न लागिएको हो । सरकारले उपत्यकामा देखिएको ट्राफिक जामको समस्या न्युनीकरणका लागि तत्कालका लागि मास ट्रान्सपोर्टेसनमा जान लागेको हो ।

हाल यो रुटमा सञ्चालन भैरहेका सवारीसाधनलाई राजधानीकै अर्को रुटमा सञ्चालनका लागि रुट इजाजत दिने सहमती भएको यातायात व्यवस्था विभागका इन्जिनियर शरद आचार्यले जानकारी दिए । विभागका अनुसार अहिले यो रुटमा सफा ट्याम्पो र माइक्रो गरी ६६ वटा सवारी साधन संचालनमा छन् ।

यातायात व्यवस्था बिभागले यो रुटमा दिगो यातायातका १७ वटा बस सञ्चालनका लागि रुट इजाजत समेत दिईसकेको छ ।

बस स्मार्ट पुस्ता लक्षित भएको कम्पनीको दाबी छ । बसमा क्यासलेस पेमेन्ट सुविधा उपलब्ध हुने कम्पनीका सचिव गुरागाईले जानकारी दिए । यसका लागि स्मार्ट कार्ड उपलब्ध गराइने कम्पनीले जनाएको छ ।

बस अपांगमैत्री हुने छ । बसभित्रै ह्विलचियर राख्न मिल्ने छ भने बस लो बेसको हुनेछ । यसबाट यात्रुहरुलाई गाडीमा चढ्न र ओर्लनका लागि सहज हुने बताइएको छ । बसमा सिसिटीभी क्यामेरा, फ्रि वाईफाई, एलइडी टीभी हुनेछ ।

बसलाई कम्पनीले अफिसबाटै निर्देशन दिनका लागि कन्ट्रोल सिस्टम जडान गर्ने ब्यबस्था गरेको छ । जिपिएस जडान हुने भएकाले बस कहाँ पुग्यो भन्ने जानकारी यात्रुहरुले आफ्नो मोबाइलबाट थाहा पाउनेछन् यसका लागि अहिले एप बनाइरहेको कम्पनीले जानकारी दिएको छ । त्यसैगरी आरक्षण सिटका लागि फरक रंग प्रयोग गरी चिन्ह सजिलो बनाइएको छ ।

बसहरु नयाँ बसपार्कदेखि गोंगबु–लैनचौर–रत्नपार्क–डिल्लीबजार–मैतीदेवी–पुरानो बानेश्वर–सिनामंगल रुटमा सञ्चालन हुनेछ । यो रुटलाई एस फाईभ रुटको नामले पनि चिनिन्छ । यो रुट करिव ९ किलोमिटर रहेको छ ।

धेरै लामो समयदेखि सरकारले यो रुटमा ठूला बस सञ्चालन गर्ने योजना बनाएको थियो । यो क्षेत्रमा सार्वजनिक यातायात सञ्चालन गरिरहेका व्यवसायीहरुले विरोध गरेका थिए । तर एसियाली विकास बैंकले १५ प्रतिशत अनुदान र नगर विकास कोषले ८० प्रतिशत ५ प्रतिशत सहुलियत ऋण दिने भएपछि व्यवसायीहरु सहमत भएका हुन् ।

नयाँ सुविधा सम्पन्न बस खरिद गर्नका लागि नगर विकास कोषले ८० प्रतिशत सहुलियत ऋण, एडिबीले १५ प्रतिशत अनुदान र काठमाडौं उपत्यका दिगो शहरी यातायात आयोजनाले ५ प्रतिशत लगानी गर्ने छ ।

प्रकाशित समय : १५:४४ बजे